اقوام متحدہ۔ 02 مئی (اے پی پی) پاکستان اقوام متحدہ نا جنرل اسمبلی آن خواست کرینے کہ او سلامتی کونسل آ زور شاغے کہ او فلسطینی الس تون مروک آ تاریخی ناانصافی تا پوروی ءِ کننگ کن اقوام متحدہ نا پورو رکنیت کن فلسطین نا درخواست آ نظرثانی و سفارش کے۔ اقوام متحدہ ٹی پاکستان نا آخبتی سفیر منیر اکرم اسہ اوڑدہی اسے ٹی پارے کہ اقوام متحدہ نا پورو باسک انا وڑاٹ ریاست فلسطین نا اِرا ریاستی ایسر و فلسطینی الس تون مروک آ تاریخی ناانصافی نا پوروی نا کنڈآ اسہ پبی ءُ سیاسی گام اس مریک۔ اوپارے کہ داوخت آ فلسطین، اسرائیل و ڈیہہ اٹی امن کن سفارت کاری برجاءِ، اگہ ویٹو پاور ءِ کاریم اٹ اتنگتو و سلامتی کونسل نا کنڈآن اقوام متحدہ ٹی فلسطین نا اوار مننگ نا سفارش ءِ کننگا تو اوٹی بھاز ترندی بریک۔ سفیر اقوام متحدہ و جہانی برادری آن خواست کرے کہ او غزہ ٹی دمدستی جنگ بندی نافذ کرفے۔ اوپارے کہ فلسطین اٹی انسانی امداد اسکان غیرمحدود رسینگ نا ضمانت ءِ تننگے، جھیڑہ ءِ پین ودنگ آن توننگے، فلسطینی تے جہانی رکھ فراوان کننگے، امن عمل ءِ بحال کننگے و اسرائیل ءِ اونا جنگی ڈوہ و انسانیت نا برخلاف ڈوہ انا زموار گوندنگے۔ اوپارے کہ داسہ انتہاپسند اسرائیلی سرکڑدہ رفح غا جلہو نا دھڑکو تننگ ءِ، دُن کہ اقوام متحدہ نا سیکرٹری جنرل پارے کہ داڑآن غزہ ٹی فلسطینی تیا بھسکار اثرمرتب مریک ہرانا سنگین ءُ نتیجہ اس برآمد مریک۔ سفیر تدوک آ ہفت دہائی ٹی فلسطینی الس نا حالیت زار ءِ مون آتخا، ہراٹی حق خودارادیت آن نمن، تینا وطن آن بے دخلی و مریس وحشیانہ درملکی کوزہ ءِ سگنگ اوار ءِ۔
