اقوام متحدہ۔ 02 مئی (اے پی پی) پاکستان جہانی مالیاتی نظام اٹی بھلو کچ اسے آ اصلاحات نا خواست کرینے تانکہ کم کٹیا والا ملک آتے چاگڑدی بدلی نا اثرآتون مون تننگ کن جوان کمک دوئی مننگ کے۔ اقوام متحدہ ٹی پاکستان نا آخبتی مندوب منیر اکرم ’’ایکسپرٹ میکانزم آن دی رائٹ ٹو ڈولپمنٹ‘‘ نا 9 می سیشن اٹی پارے کہ ننا غٹ آن بھلا اولیت پدتموک ملک آتیکن دمدستی کمک وجزوی و غیرمساوی جہانی مالیاتی، واپار وٹیکنالوجی نا نظام اٹی اصلاحات نا کمک اٹ پدتموک ملک آتا گرج آتے پورو کننگ کن ترند رفتار و بریبر شونداری ءِ مون آ دننگ ءِ۔ ایکسپرٹ میکانزم جنیوا ٹی جوڑ انسانی حق کونسل ءِ باسک ملک آتون گچین وڑتا پٹنگ، شناخت و شریداری ٹی شونداری نا حق آ مہارت فراوان کیک و مچ آ دنیا ٹی شونداری نا حق انا نفاذ ءِ مون آ دیک۔ پاکستانی مندوب پارے کہ نن سمجھنہ کہ ہراڑے ریاست آتا بنداوی زمواری ءِ کہ او انسانی حق ءِ مون آ دیر ہموڑے اقوام متحدہ نا نظام و جہانی مالیاتی ادارہ غاتا دا جتماعی زمواری ءِ کہ او جہانی اقتصادی و شونداری پالیسی تے دا وڑتے اٹ ہم گرنچ کیر ہرا شونداری نا حق انا دوئی کننگ اٹ کمک فراوان کیر۔ دارداٹ، او شونداری نا بنداوی حق ءِ دوئی کننگ کن سازگار چاگڑد نا گرج و غٹ انسانی حق انا متوازن مون آ دننگ نا اہمیت آ زور شاغا۔
