لاہور۔ 02 مئی (اے پی پی) لاہور نا انسداد رشوت ستانی نا خصوصی عدالت اٹ پنجاب اسمبلی بھرتی تیٹی بے ڈولی نا دوبہ ٹی نوشتہ مقدمہ ٹی دزگیر مسکوہی اسپیکر و مسکوہی وزیراعلیٰ پنجاب چوہدری پرویز الٰہی ، مسکوہی پرنسپل سیکرٹری محمد خان بھٹی تون اوار ایلودوبہ دارآتیا پنچ شنبے نادے آ ہم فرد جرم بیٹ مننگ کتو۔ عدالت مسکوہی وزیراعلیٰ پنجاب چودھری پرویز الٰہی و ایلو دوبہ دار آتے فرد جرم عائد کننگ کن 13مئی آ بٹنگا۔ لاہور نا اینٹی کرپشن عدالت نا جج ارشد حسین کیس انا پنچ شنبے نادے آ سماعت ءِ کرے۔ سماعت آ چوہدری پرویز الٰہی ءِ عدالت اٹ پیش کننگتو۔ اڈیالہ زندان کمامدارآتاکنڈآن پرویزالٰہی نا میڈیکل سرٹیفکیٹ ءِ عدالت اٹ پیش کننگا ہراٹی پاننگاکہ چوہدری پرویز الٰہی ناجوڑ ءِ، او عدالت اٹ پیش مننگ کپک۔ عدالت اٹ اڈیالہ زندان کمامدارآتا کنڈآن جمع کرفوک آ میڈیکل رپورٹ اٹی پاننگاکہ مسکوہی وزیراعلیٰ پنجاب چوہدری پرویز الٰہی سفر کننگ کپک، خواست ءِ کہ چوہدری پرویز الٰہی نا جوڈیشل ریمانڈ اٹی ودکی کننگے وخت اس کہ سماعت اٹی ایلو 10 شریک دوبہ دار آک عدالت اٹ حاضری کن پیش مسر و تینا حاضری ءِ خلفیر۔ عدالت مسکوہی وزیراعلیٰ پنجاب چوہدری پرویزالٰہی ءِ پیش کپننگ آ فردجرم عائد کننگ نا کارروائی ءِ اسہ وار ولدا موخرکرے و بروک آ سماعت آ غٹ دوبہ دار آتے پیش مننگ نا پارت کرسا سماعت ءِ 13 مئی اسکان پدبٹے۔
