کوئٹہ۔ 02 مئی (اے پی پی) صوبائی سیکرٹری کشت وکشار محمد داؤد بازئی پارینے کہ زمیندار و محکمہ کشت وکشار نا نیام اٹ فاصلہ ءِ کم کننگ المی ءِ، محکمہ ٹی سزا و جزا نانظام نافذ کرسا غیرحاضر آفیسر و ملازم آتا برخلاف کانود نا رداٹ کارروائی کننگک۔ داہیت ءِ او سیکرٹری کشار وکشار ناچارج ءِ سنبھالنگ آن پد درستی راستی دیوان آن تران کرسا کرے، داوخت آ محکمہ کشت وکشار نا چندی بشخ آتا ڈائریکٹر جنرلز، ایڈیشنل سیکرٹری و ایلوفک ہم ساڑی ئسر۔ سیکرٹری کشت وکشار محمدداؤد بازئی پارے کہ وزیراعلیٰ میر سرفراز بگٹی و وزیرخور حاجی علی مدد جتک نا پارت آتے مون آتخسا کرپشن نا برخلاف زیروٹالرینس نا پالیسی آ عمل کرسا زمیندار آتا ویل آتا ایسری کن اصلاحات نا بناءِ کننگ ءِ وخت اس کہ دفترآتیٹی بائیو میٹرک حاضری نا نظام ءِ فعال کرسا ڈیوالئی ءِ سگنگ پننگک۔ اوپارے کہ کشاری بشخ آتیٹی ٹیکنالوجی ءِ مون آ درسا بزغر و زمیندار آتیکن آسانی ودی کننگک تانکہ محکمہ کشت وکشار و بزغرآتا نیام اٹ فاصلہ ءِ کم کرسا کشاری شونداری نا ہدف آتے کم وکت اٹی دوئی کننگ مرے۔
