اسلام آباد۔ 30 اپریل (اے پی پی) بنجائی وزیر اقتصادی امور احد خان چیمہ پارینے کہ پاکستان بھلا مشینری و پلانٹ آتیٹی اسیجائی ڈٹ آتیکن بیلاروس نا ہارت آن فائدہ ہرفینے، پاکستان بیلاروس اسیجائی وزارتی کمیشن نا سرسہب شش میکو دیوان اٹی واپار، کشت وکشار، جان جوڑی، سائنس و ٹیکنالوجی، سیل و سوات و صنعتی بشخ اٹی زرکاری ٹی پین کمکاری ءِ مون آ دننگ آگپ وتران کننگانے۔ داخیال آتا درشانی ءِ او سے شنبےنادے آ جمہوریہ بیلاروس نا سفیر اینڈری میٹیلیساتون اوڑدہی ٹی گپ وتران کرساکرے۔ بنجائی وزیر اقتصادی امور احد خان چیمہ جمہوریہ بیلاروس نا سفیر ءِ جم وجوش اٹ بخیرکرے۔ اوڑدہی ٹی تین پہ تینی است خواہی نا امور آ گپ وتران کننگا ہرافتے ٹی پاکستان بیلاروس اسیجائی وزارتی کمیشن (جے ایم سی) نا جنوری 2023اتی منسک، بیلاروس اٹی مروک آشش می دیوان اٹی کروک آ عزم اوار ءِ۔ داوخت آ جمہوریہ بیلاروس نا سفیر آندرے میٹیلیسا ہڑتوم آ کنڈآتا تعلقداری تے پین مون آ دننگ اٹ بھاز است خواہی ظاہر کرے و داہیت آ زور شاغا کہ ہڑتوم آ ملک آتا نیام اٹ واپار کاریم نا کچ آن بھاز کم ءِ و اودے حکومت تون حکومت و واپار تون واپار نا کمک اٹ تعامل، واپاری نمائش و بینکنگ نا وڑوڈول نا ہم گرنچی اٹ مون آ دننگ نا گرج ءِ۔ بنجائی وزیر چیمہ پاکستان نا زرعی مشینری بشمول ٹریکٹرز و ہارویسٹر نا کاریم اٹ اتنگ نا لائخی آن معلومدار کرے خاص کر پاکستانی فرم آتون اسیجائی ڈٹ آتا کمک اٹ پاکستانی مارکیٹ اتون ہم گرنچی آ زور شاغا۔
