اسلام آباد۔ 30 اپریل (اے پی پی) وزارت مذہبی امور سرکاری اسکیم نا غٹ حاجی تے پارینے کہ او تینا موبائل آ پاک حج موبائل ایپ ءِ دمدستی ڈاؤن لوڈ کیر و اونا راہشونی نا رداٹ تینا تعلقدار حاجی کیمپ اتون رجوع کیر۔ وزارت مذہبی امور نا ترجمان نا رداٹ سرکاری اسکیم ناغٹ حاجی تیکن پاک حج ایپ ڈاؤن لوڈ کننگ المی ءِ۔ اوسرکاری اسکیم نا حاجی تے پارینے کہ دا ایپ انا کمک اٹ ملوک آ نوٹیفکیشن نا رداٹ او تینا تعلقدار حاجی کیمپ آ ہنسا ویکسین خلفنگ تون اوار اوار دوائی تا پیکنگ و حج گفٹ انا ہلنگ ءِ پک کیر۔ اوپارے کہ نرینہ حاجی تے حاجی کیمپ آن اسہ بھلو ٹرالی بیگ ، ہنڈ کیری بیگ، شوز بیگ، احرام و بیلٹ اس فراوان کننگک وخت اس کہ زالبول آتے اسکارف تننگک۔ داکان بیدس سرکاری اسکیم نا غٹ حاجی تےسعودی موبائل سم فراوان کننگک۔ ترجمان نا رداٹ برجاسال سرکاری حج پیکج اٹی حج مقدس اٹی سرمننگ آ حاجی تے ایئرپورٹ آن ہنکین ٹرانسپورٹ نا فراوانی اتون اوار اوار 24 گھنٹہ ہروخت حرم ٹرانسپورٹ انٹرسٹی بس، مسہ وخت اناکن وخور، منیٰ ، مکتب و ٹرین نا آسراتی آن بیدس وطن آ پدی بننگ آ 5 لیٹرزمزم فراوان کننگک۔
