راولپنڈی۔ 30 اپریل(اےپی پی) راولپنڈی ٹی ڈولفن فورس اٹی تعینات نادرست دوبہ دار آتا سم کاری آن شہید مروک آ کانسٹیبل اسماعیل رؤف نا نماز جنازہ ءِ پولیس لائنز ہیڈکوارٹرزاٹی خواننگا۔ پولیس ترجمان نارداٹ پولیس ناچاق وچوبند دستہ غاک شہید کانسٹیبل نا میت ءِ سلامی پیش کریر، نماز جنازہ ٹی ایس ایس پی آرآئی بی عارف شہباز خان، ایس ایس پی آپریشنز فلائٹ لیفٹیننٹ (ر) حافظ کامران اصغر، پاک آرمی، سول انتظامیہ و خاہوت آتون پولیس آفیسر و ورناک و شاری تا بھلو کچ اس بشخ ہلکر۔ نماز جنازہ نا خواننگ آن پد شہید کانسٹیبل نا جسدخاکی سرکاری اعزاز اتون اونا باوہ پیرہ ئی آ علاقہ تھانہ چونترہ (ڈھولیال) روانہ کننگا، شہید کانسٹیبل اسماعیل رؤف تدوک آ دے مری روڈ آ نادرست کار سوار دوبہ دار آتا سم کاری آن شہید مسوسس، وخت اس کہ کانسٹیبل عاصم سم کاری آن ٹھپی مسوسس، شہید کانسٹیبل اسماعیل رؤف پدسلوک آتیٹی لمہ، جنوزان و اِرا مار ءِ الانے۔ ایس ایس پی آپریشنز فلائٹ لیفٹینٹ (ر) حافظ کامران اصغر نا پاننگ ئس کہ شہید نا بے مٹ قربانیک محکمہ کن عزت و شرف نا سوب ءُ، شہید پولیس آک ننا محسن ءُ ہرافتا قربانی تے اسُل است آن دننگ مفک، شہید انا خاہوت ننا فیملی نا آنبار ءُ، نن ہروخت، ہرساہت ، شہید آتا خاہوت آتون سلوک اُن، شہید کانسٹیبل اسماعیل رؤف ڈوہدار آتون مقابلہ کرسا تینا جون ءِ ندر کرے، شہید نا قربانی تے مدام یات تخنگک ، راولپنڈی پولیس نا 117 آفیسر فرض انا کسر اٹی تینا جون تے ندر کرینو، راولپنڈی پولیس ڈوہ انا توننگ و شاری تا رکھ اٹی ہروڑنا قربانی ایتک۔
