ملتان۔ 30 اپریل (اے پی پی) سیکرٹری داخلہ پنجاب نورالامین مینگل پارینے کہ ملتان شار انا شونداری، امن و ایمنی ءِ قائم تخنگ کن ڈویژنل انتظامیہ و پولیس نا تین پہ تینی کمک المی ءِ۔ داخیال آتا درشانی ءِ او کمشنر ملتان نا آفس اٹی امن و ایمنی نا حالیت آتاجاچ ءِ ہلنگ کن اڈ ہلوک دیوان نا کماشی ءِ کرسا کرے۔ دیوان اٹی کمشنر ملتان مریم خان، آرپی او کیپٹن (ر) سہیل چوہدری تون اوار غٹ تعلقدار محکمہ غاتا آفیسر آک ساڑی ئسر۔ دیوان اٹی سیکرٹری داخلہ پنجاب قیام کن سلہہ غاتا نمائش آ سخت پابندی ءِ پک کننگ نا پرمان کرے۔ دیوان آن تران کرسا کمشنر ملتان مریم خان پارے کہ ملتان شار اتون اوار مچ آ ڈویژن اٹی امن و ایمنی نا حالیت است جم ءِ۔ حکومت پنجاب نا پارت آ منشیات نا عادی بندغ آتا بحالی نا گام گیج کننگ انگ ءِ۔ مریم خان پارے کہ ڈرگ ری ہیبلی ٹیشن سینٹر اٹی رہینگوک آ بندغ آتیکن ووکیشنل ٹریننگ نا بست وبند ءِ کننگانے۔ کورس پورو مننگ آن پد ٹیوٹا دا بندغ آتے سرٹیفکیٹ ہم جاری کیک۔ داوخت آ ریجنل پولیس آفیسر کیپٹن (ر) سہیل چوہدری پارے کہ ڈویژن اٹی پولیس نفری نا کچ 10 ہزار 504 ءِ وخت اس کہ تھانہ غاتا کچ 82 ءِ۔ اوپارےکہ ڈویژن اٹی امن و ایمنی نا حالیت آک جوان ءُ۔ داکان بیدس ڈویژن اٹی چار رکھ ہند جوڑ ءِ ہراڑے 2598 شاری تے ریلیف تننگا۔ آرپی او پارے کہ تھانہ غاتیٹی پوسکن آ سسٹم و مفاہمتی کلچر لگوک ءِ وخت اس کہ غاوتیا دمدستی ایکشن ہلنگک۔
