واشنگٹن۔ 30 اپریل (اے پی پی) جہانی مالیاتی فنڈ(آئی ایم ایف ) نا ایگزیکٹیو بورڈ پاکستان کن 1.1 ارب ڈالر قسط انا منظوری ءِ تسنے۔ آئی ایم ایف نا کنڈآن جاری بیان نا رداٹ دوشنبےنادے آ جہانی مالیاتی فنڈ (آئی ایم ایف) نا ایگزیکٹیو بورڈ سٹینڈ بائی معاہدہ نا رداٹ پاکستان نا زرگزرانی اصلاحاتی پروگرام نا ارٹ میکو و آخیریکو جاچ ءِ پورو کرے۔ بورڈ پاکستان کن 1.1 ارب ڈالر قسط جاری کننگ نا منظوری ءِ تسنے اوکان پد معاہدہ نار داٹ پاکستان ءِ تروک آ کمکاری نا کچ 3 ارب ڈالر مریک۔ آئی ایم ایف 12 جولائی 2023 آ ملکی و بیرونی عدم توازن ءِ مر کننگ تون کثیر جہتی و ہڑتوم آ کنڈآتا شریدار آتا مالی کمک کن اسہ فریم ورک اس فراوان کریسس۔ فریم ورک انا رداٹ المی مالیاتی ایڈجسٹمنٹ و مالی سال 2024نا بجٹ نا نفاذنا کمک اٹ وام نا پائیداری ءِ برقرار تخنگ آ چکار کننگا و اہم راجی خڑچ آتا رکھ ءِ پک کننگا۔ فریم ورک نا رداٹ پیشن نا شاکس آتا توننگ، زرمبادلہ نا کوڑی تیٹی ودکی ، سخت مالیاتی پالیسی ءِ برقرارتخسا افراط زر اٹی کمتی کن پیش رفت، شعبہ توانائی، سرکاری ملکیتی ادارہ غاتیٹی گورننس نا گچینی و موسمیاتی موزونیت نا رداٹ پنجرجاتی اصلاحات آ پیش رفت ءِ مون آ دننگ اوار ئس۔ آئی ایم ایف نا رداٹ پروگرام اٹی پاکستان اٹی آجوزرگزران نا حالیت آتیٹی گچینی بس، مالی سال انا ارٹ میکو ششماہی ٹی پدریسہ ریکوری نا رداٹ برجامالی سال اٹی اِرا درسد ناشرح نمو گمانی ءِ۔ مالی سال 2024نا اولیکو ششماہی ٹی جی ڈی پی نا 1.8 درسد نا بنداوی سرپلس اتون مالیاتی پوزیشن سوگو مرسا ہِننگ ءِ ، ہرا کساس آتیان بھاز مونی ءِ و پاکستان برجامالی سال انا ایسر اٹ جی ڈی پی نا 0.4 درسد نا پرائمری سرپلس ءِ دوئی کننگ نا کنڈآ ہِننگ ءِ۔ آئی ایم ایف نا بیان نا رداٹ پاکستان اٹی افراط زر اٹی کمتی بننگ ءِ برجاپبی پالیسی و اصلاحاتی گام گیج آتا رداٹ افراط زر اسٹیٹ بینک انا ہدف آ بایدے پدی برے و نیامی مد اٹی نمو پدریسہ سوگو مرے۔ ملکی زرمبادلہ نا جم کوڑی کم و ود 8 ارب ڈالر اسکان ودانے، ہراکہ پروگرام نا بناٹی 4.5 بلین ڈالر ئسر۔ آئی ایم ایف نا ڈپٹی منیجنگ ڈائریکٹر انتونیٹ سائیح پارینےکہ اسٹینڈ بائی معاہدہ نا رداٹ پاکستان نا پرعزم پالیسی کوشست آتیان زرگزرانی سوگوی و زرگزرانی بحالی ٹی پیش رفت مسنے۔ ملک اٹی پیشن نا کھاتہ غاتا زور اٹی کمتی بسنے۔ کبینی ٹی پدریسہ کمتی بننگ ءِ۔ اوپارے کہ بروک آ اہم چیلنج آتا رداٹ پاکستان ءِ سوگو، جوان و پائیدار نمو ودی کن سوگو زرگزرانی پالیسی و ساختی اصلاحات تون مشکل اٹ دوئی کروک آ سوگوی آن بایدے فائدہ ہرفنگے۔ اوپارےکہ بنجائی و صوبائی ہڑتوم آکہول آ محصولات آتیٹی ودکی نا پدریسہ کوشست و خڑچ آتا نظم وضبط داہیت ءِ پک کننگ کن اہم ءِ کہ سرپلس نا بنداوی ہدف دوئی کننگے۔ اوپارے کہ پاکستان وخت آ ٹیرف ایڈجسٹمنٹ و وصولی نا کوشست آتیٹی ودکی نا کمک اٹ پروگرام اٹی توانائی نا بشخ انا گردشی وام ءِ سوگو کرینے۔ آئی ایم ایف نا رداٹ سوگو، مریس مدی جوان شونداری نا دوئی کننگ و ملازمت ودی کننگ کن پنجرجاتی اصلاحات اٹی ترندی اتنگ و بے نظیر انکم سپورٹ پروگرام نا کمک اٹ زرگزرانی وڑاٹ نزور تپہ غاتا پدریسہ رکھ انا گرج ءِ۔
