ریاض۔ 30 اپریل (اے پی پی) وزیراعظم شہباز شریف سعودی ولی عہد و وزیراعظم محمد بن سلمان آل سعود تون دوشنبے نادے آ داڑے اوڑدہی کرے، ہڑتوم آ راہشونک مکہ مکرمہ ٹی مروک آ تینا اوڑدہی ٹی کروک آ فیصلہ غاتیا پیش رفت آ است جمی نا درشانی ءِ کریر۔ وزیراعظم آفس نا میڈیا ونگ آن جاری بیان نا رداٹ ہڑتوم آ راہشونک چندی بشخ آتیٹی کمکاریءِ پین ودفنگ آ امنا کریر۔ وزیراعظم سعودی وزیرخارجہ نا کماشی ٹی بڑزکوکہولی ڈل پاکستان آ گدریفنگ و زرکاری نا بابت پین ڈل آتے پاکستان آ گدریفنگ نا بابت ولی عہد نا منت واری ءِہرفے۔ وزیراعظم تینا دورہ ءِ سعودی عرب اٹی شاندار مہمانداری و سعودی وزیر آتا کنڈآن پاکستان اٹ سعودی زرکاری نا بابت جوان پروگرام اس مرتب تننگ آ ولی عہد نا منت واری ءِ ہرفے۔ اوڑدہی ٹی غزہ نا حالیت آتیا ہم گپ وتران کننگا۔ وزیراعظم سعودی ولی عہد ءِ دورہ ءِ پاکستان نا سلہ نا درشانی ءِ کرے۔
