اسلام آباد۔ 30 اپریل (اے پی پی) وزیراعظم محمد شہباز شریف آئی ایم ایف نا آخیریکو مالیاتی قسط نا جاری مننگ آ است جمی نا درشانی ءِ کرسا پارینے کہ 1.1 ارب ڈالر نا آخیریکو قسط ملنگ آن پاکستان اٹی پین زرگزرانی سوگوی بریک۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف آئی ایم ایف نا آخیریکو مالیاتی قسط انا جاری مننگ آ است جمی نا درشانی ءِ کرینے۔ وزیراعظم پارے کہ آئی ایم ایف 1.1ارب ڈالر نا آخیریکو قسط ملنگ آن پاکستان اٹ پین زرگزرانی سوگوی بریک۔ 2016اٹی کنا قائد نواز شریف آئی ایم ایف پروگرام ءِ پورو کریسس، دا ایس بی اے ارٹ میکو پروگرام ءِ ہرا پورو مننگ ءِ۔ 16 تُو انا حکومت اٹی پاکستان ءِ ڈیفالٹ آن بچفنگ اٹ آئی ایم ایف تون دا معاہدہ اہم پک مسوسس۔ پاکستان نا زرگزرانی رکھ اکن تلخ و مشکل فیصلہ کرین ولے اوفتا بھرم زرگزرانی سوگوی نا دروشم اٹ مون آ بننگ ءِ۔ وزیراعظم پارے کہ اللہ تعالیٰ زرگزران ءِ گچین کننگ نا موقع تسنے، پاکستان ءِ زرگزرانی شونداری ترفنہ۔ وام ہلنگ سرسہبی اف، سرسہبی ہمودے آ مریک ہرادے وام آن نجات ہلینہ۔ وزیراعظم پارے کہ ہندا جوزہ اٹ سہی سمت اٹ تسلسل اٹ خواری برجاسلیس تو وام تیان نجات و زرگزرانی شونہالی نا دور ہم زوت بریک۔ وزیراعظم وزیرخارجہ محمد اورنگزیب تون اوار غٹ زرگزرانی ٹیم انا کوشست آتا ستاءکرے۔ وزیراعظم پارے کہ آئی ایم ایف نا منیجنگ ڈائریکٹر نا ہم منت واری ءِ ہرفیوہ ہراپاکستان تون مشکل وخت اٹی تفے۔
