خصوصی انسداد پولیو مہم نا بناء، 2 کروڑ 40 لکھ آن زیات ناتے پڑی کُنفنگک، ڈاکٹر ملک مختار احمد بھرتھ

اسلام آباد۔ 29 اپریل (اے پی پی) وزیراعظم نا کوآرڈی نیٹر قومی جان جوڑی ڈاکٹر ملک مختار احمد بھرتھ پارینے کہ حکومتِ پاکستان مچ آ ملک انا چناتے پولیو نا مرض آن تکھ کننگ کن مہالو آن زیات سنبرینگوک ءِ، ملک انا 19 ضلع غاتیٹی 29 اپریل دوشنبے نادے ان پنچ سال آن کم وئی 2 کروڑ 40 لکھ آن زیات چناتے مچ آ وئی کن معذور کروک آپولیو دین آن بچفنگ نا پڑی کُنفنگ نا خصوصی پولیو مہم بناکیک۔ دوشنبے نادے آ  وزارت جان جوڑی آن جاری بیان نا رداٹ اوپارے کہ خصوصی انسدادِ پولیو مہم اسلام آباد، پنجاب نا 10 ضلع، سندھ انا 24 ضلع، خیبرپختونخوانا 26 ضلع و بلوچستان نا 30 ضلع غاتیٹی اڈ تننگ انگ ءِ ہراٹی پولیو ٹیمک ہراُراغا ہنسا 5 سال آن کم وئی چناتے پولیو آن بچفنگ نا پُڑی کنفرہ۔ ساڑی آ دے تیٹی ملک اٹی سیوریج نا دیر انا چندی وڑتیٹی پولیو دین خننگانے ہرانا مطلب ءِ کہ دا دین چناتا جان جوڑی کن اسہ بھلو خطرہ اسے۔ ڈاکٹر ملک مختار احمد بھرتھ مستی پارے کہ پولیو لاعلاج مرض اسے و داڑآن بچنگ نا اسٹ انگا ایسر ویکسی نیشن ءِ۔ اومستی پارے کہ پولیو مہم اٹی پولیو ورکرآک نما درگہ غابریرہ اوفتے تون پورو کمک کبو و تینا 5 سال آن کم وئی چناتا ویکسی نیشن ءِ پک کبو۔ کوآرڈی نیٹر قومی ایمرجنسی آپریشنز سینٹر ڈاکٹر شہزاد بیگ پارے کہ دا اسہ بھازاہم ءُ مہم اسے ہرادے ہموضلع غاتیٹی اڈتننگ انگ ءِ ہراڑے پولیو دین نا تالانی نا زیات خطرہ ءِ۔ ڈاکٹر شہزاد بیگ مستی پارے کہ نن داسال 31 ضلع غاتیٹی پولیو دین نا ڈس ءُ نشان ءِ خلکونن ہنداسوب ءِ کہ نن دا غٹ ہائی رِسک ضلع غاتیٹی باقاعدگی اٹ پولیو مہم ءِ اڈتننگ اُن تانکہ داہیت ءِ پک کننگ مرے کہ چناتیٹی دا دین اتون جنگ تننگ کن قوت مدافعت ودی مرے۔