ساڑی دور اٹی حج انا بحری سفر قابل عمل اف، غٹ حج بست وبند آتے ڈیجیٹیلائز کننگانے، ڈاکٹر عطاء الرحمان

اسلام آباد۔ 29 اپریل (اے پی پی) سیکرٹری مذہبی امور ڈاکٹر عطاء الرحمان پارینے کہ ساڑی دور اٹی حج انا بحری سفر قابل عمل اف، برجاسال ایندھن و ڈالر ناقدر اٹی ودکی آن پد ہم ہوائی جہاز نا کِرا15 آن 30 ہزار روپئی کم کرفنگانے، اسہ ہم کمکارحج اسےنا گچین کاری ءِ میرٹ آن اینک کننگتنے، غٹ حج بست وبند آتے ڈیجیٹیلائز کننگانے، اومیت ءِ کہ بروک آ حج انا آزموندہ بھاز جوان مریک۔ دوشنبے نادے آ وزارت مذہبی امور اٹی پریس کانفر نس آن تران کرسا اوپارے کہ حج و بین المذاہب ہم آہنگی تون اوار ایلو گڑاس امور وزارت مذہبی امور نا زمواری ءِ، حج انا وخت آ پاکستانی حاجی تے ہنکین و ٹرانسپورٹ تون اوار ایلو آسراتی تا فراوانی ننا اہم زمواری ءِ۔ اوپارے کہ 15 نومبر آحج پالیسی کابینہ منظور کرے۔ پاکستان نا کوٹہ اسہ لکھ 79 ہزار 210 ءِ ہرا سرکاری و پرائیویٹ اسکیم تیٹی بشخنگا۔ اوپارے کہ تدوک آ منہ سال آن سرکاری حج انا آزموندہ گچین مسنے، سرکاری حج اسکیم اٹی 25 ہزار نا کوٹہ سپانسر اسکیم نا رداٹ جتا کننگا۔ اوپارے کہ بروک آ سال پورو حج کوٹہ ءِ کاریم اٹ اتنگ نا کو شست کینہ، تانکہ ننا حج کوٹہ ٹی کمتی کننگپ۔ داوار سعودی حکومت نا پالیسی ئس کہ حج بست وبند آتے زوت پورو کننگے اونا سوب آن نن حج آپریشن نا زوت بناءِ کرین۔ اوپارے کہ 64 ہزار سرکاری اسکیم و 5ہزار آن گڑاس زیات سپانسر شپ اسکیم نا رداٹ حج انا فرض ءِ ادا کیرہ۔ اوپارے کہ پرائیویٹ اسکیم نا رداٹ حاجی تا بکنگ برجاءِ، پرائیویٹ اسکیم نارداٹ سپانسر شپ اسکیم کن 43 ہزار ناکچ جتا کننگانے۔