اسٹیبلشمنٹ و عمران خان ڈیل انا سمااف، مون انگا شیشہ غاتا غٹ پرمٹ آتے منسوخ کننگ اُن، محسن نقوی

اسلام آباد۔ 29 اپریل (اے پی پی) بنجائی وزیر داخلہ محسن نقوی پارینے کہ اسٹیبلشمنٹ و عمران خان ڈیل انا سمااف، ای سی ایل کمیٹی رولز انارداٹ منہ مخلوق نا پن ءِ کشانے، دا معمول نا کارروائی مریک، غیرکانودی وڑاٹ جاری مروک مون انگا شیشہ غاتا غٹ پرمٹ آتے منسوخ کننگ اُن، اسلام آباد ٹریفک پولیس اینو آن مچ آملک انا ہر بشخ انا ہنکینی نا اسلام آباد آن ڈرائیونگ لیسن جاری کیک، بنجائی دارالحکومت نا ہنکینی 70 سال آن زیات وئی نا مخلوق نا لیسن اونا اُراغا ہنسا جوڑ کننگک، پاسپورٹ جاری کننگ اٹ تاخیر نا چندی سوب آک ءُ، پاسپورٹ اتھارٹی نا جوڑ کننگ نا حامی اُٹ، زوت وزارت داخلہ دا بابت کانود سازی کن ڈرافٹ نا بابت بنجائی کابینہ ءِ معلومدار کیک۔ او دوشنبےنادے آ ایف نائن پارک اٹی اسلام آباد ٹریفک پولیس نا کنڈآن موبائل لیسن ولرننگ وینز، ٹریفک پولیس ایجوکیشن سروس نا جاری کننگ نا وخت آ صحافی تتون گپ وتران کریکہ۔ آئی جی اسلام آباد ناصر رضوی، ایس ایس پی ٹریفک و ایلو پولیس کمامدارآک داوخت آ ساڑی ئسر۔ وزیرداخلہ ٹریفک پولیس نا کنڈآن بناکروک ہڑتوم آ سروس آتا باقاعدہ بناءِ کرے و موبائل وین نا ہم معائنہ ءِ کرے۔ آئی جی اسلام آباد بنجائی وزیرداخلہ ءِ حوال تس۔ وزیرداخلہ محسن نقوی پارےکہ اسلام آباد نا شاری تے ہرممکن آسراتی تا فراوانی کنا اولیت ءِ۔