صدر مملکت آصف علی زرداری تون آزاد کشمیر نا وزیراعظم انوارالحق نا اوڑدہی

اسلام آباد۔ 29 اپریل (اے پی پی) صدر مملکت آصف علی زرداری حق خودارادیت نا دوئی کننگ اسکان بھارت نا غیرکانودی کوزہ ٹی جموں وکشمیر نا الس نا اخلاقی ، سیاسی و سفارتی مخ تفی ءِ برجاتخنگ نا پاکستان نا عزم انا درشانی ءِ کرسا ہموڑے کوزہ گیر بھارتی فوج انا کنڈآن انسانی حق انا خلاف ورزی و ظلم انا مذمت ءِ کرینے۔ ایوان صدر نا پریس ونگ آن جاری بیان نا رداٹ صدر مملکت داخیال آتا درشانی ءِ آزاد کشمیر نا وزیراعظم انوارالحق تون گپ وتران کرسا کرے ہرا دوشنبے نادے آ داڑے ایوان صدر اٹی اوڑتون اوڑدہی کرے۔ صدر مملکت پارے کہ جہانی برادری بھارت آ انسانی حق انا خلاف ورزی تے بند کننگ و اقوام متحدہ نا سلامتی کونسل نا قرارداد آتیا عملدآمد کرفنگ کن زور شاغے۔ اوڑدہی ٹی آزاد کشمیر نا جم حالیت، شونداری  نا بابت امور آ گپ وتران کننگا۔ صدر پارےکہ آزاد کشمیر اٹی سیل و سوات نا بے پنا ہ وارخواہی ساڑی ءِ، سیل و سواتی تے اتنگ کن آزاد کشمیر نا سیل وسوات نا بشخ ءِ پبی لائخی اسکان شون تننگ نا گرج ءِ۔ اوپارےکہ آزاد کشمیر اٹی سیل وسوات آن راجی و اقتصادی شونداری و زرگزرانی سرجزآتا مون آ دننگ اٹ کمک رسینگک۔ صدر مملکت پارے کہ پاکستان آزاد کشمیر نا زرگزران نا چندی بشخ آتیٹی زرکاری کن ہرممکن کمک فراوان کیک۔ آصف علی زرداری پارے کہ آزاد کشمیر نا ورناتے پوسکن  کسب و تعلیم آن شپ کننگ نا گرج ءِ، کسبکار ورناک آزاد کشمیر نا شونداری ٹی تینا کڑد ءِ ادا کیرہ۔ صدر مملکت پارے کہ پاکستان کاربن کریڈٹ مارکیٹ آن فائدہ ہرفنگ اٹ آزاد جموں و کشمیر حکومت نا کمک ءِ کننگ کیک۔ صدر مملکت آزاد کشمیر نا وزیراعظم و اونا حکومت ءِ تینا مخ تفی نا باوری کرفے۔ وزیراعظم آزاد کشمیر داوخت آ صدر مملکت ءِ آزاد کشمیر نا دورہ ءِ کننگ و کانود ساز اسمبلی آن تران کننگ نا سلہ خلک۔