وزیراعظم شہباز شریف نا بل گیٹس اتون اوڑدہی ، گیٹس فاؤنڈیشن تون سوگو شریداری ءِ پک کننگ کن اواری اٹ کاریم ءِ برجاتخنگ نا عزم انا درشان

ریاض۔ 29 اپریل (اے پی پی) وزیراعظم محمد شہباز شریف دوشنبےنادے آ ریاض اٹی ورلڈ اکنامک فورم نا خصوصی دیوان نا وخت آ بل اینڈ ملینڈاگیٹس فاؤنڈیشن نا بانی و شریک چیئرمین بل گیٹس تون اوڑدہی کرے، بل گیٹس پنجاب اٹی بطور وزیراعلیٰ شہباز شریف نا کماشی ٹی رکھی ٹیکہ و  پولیو نا رکھی پڑی تا پروگرام نا ستاءِ کرسا داوڑنا پروگرام ءِ مچ آ ملک اٹی تالان کننگ نا سلاہ تس وخت اس کہ وزیراعظم پاکستان و گیٹس فاؤنڈیشن نا نیام اٹ سوگو شریداری ءِ پک کننگ کن بل گیٹس اتون اواری اٹ کاریم ءِ برجاتخنگ نا عزم انا تینا درشانی ءِ کرے۔ وزیراعظم آفس نا میڈیا ونگ آن جاری پریس ریلیز نا رداٹ وزیراعظم محمد شہباز شریف دوشنبےنادے آ ریاض اٹی ورلڈ اکنامک فورم نا خصوصی دیوان نا وخت آ بل اینڈ ملینڈاگیٹس فاؤنڈیشن نا بانی و شریک چیئرمین بل گیٹس تون اوڑدہی کرے۔ داکان مست ہڑتوم آ راہشونک جہانی اقتصادی فورم نااسہ بڑزکو کہولی پینل شرہ سے ٹی بشخ ہلکوسس ہرانا سرحال ‘‘ جہانی جان جوڑی نا ایجنڈا نا پوسکن آ ستاء’’ ئس۔ وزیراعظم تینا دُوارہ گچین کاری آ بل گیٹس نا تہنیتی چٹھی آ اونا منت واری ءِہرفے۔ تینا مسکوہی دور ءِ حکومت اٹی بل گیٹس اتون تینا اوڑدہی نا ذکر ءِ کرسا وزیراعظم پاکستان و گیٹس فاؤنڈیشن نا نیام اٹ سوگو شریداری ءِ پک کننگ کن بل گیٹس اتون اواری اٹ کاریم ءِ برجاتخنگ نا تینا عزم انا درشانیءِ کرے۔ وزیراعظم پارے کہ پاکستان ملک آن پولیو نا چٹفنگ کن سخت خواری کننگ اٹی ءِ۔ اوپاکستان اٹ پولیو نا چٹفنگ کن متکن آ کمکاری آ بی ایم جی ایف نا منت وار ی ءِ ہرفے و پارےکہ پولیو آن  پاک پاکستان نا گڈیکو مسخت اسکان سرمننگ کن غٹ شریدار آتا کنڈآن پدریسہ کوشست آتا گرج ءِ۔ بل گیٹس پنجاب اٹی بطور وزیراعلیٰ شہباز شریف نا کماشی ٹی رکھی ٹیکہ و پولیو نارکھی ٹیکہ پڑی تا پروگرام نا ستاءِ کرسا دا طرز عمل ءِ مچ آملک اٹی تالان کننگ نا سلاہ تس۔ بل گیٹس پاکستان نا کوشست آتا ستاءِ کرسا پارے کہ پولیو نا چٹفنگ آخبت نا چین تے دا مہلک ناجوڑی آن بچفنگ کن بھا زا لمی ءِ۔ وزیراعظم و بل گیٹس پاکستان و فاؤنڈیشن نا نیام اٹ رکھی ٹیکہ، غذائیت ومالیاتی شمولیت نا بشخ آتیٹی برجاسرجز آتیا ہم گپ وتران کریر۔ وزیراعظم پارے کہ گیٹس فاؤنڈیشن پاکستان نا راجی و اقتصادی شونداری ٹی اسہ پت انا قابل شریدار ءِ و آئی ٹی و ڈیزاسٹر مینجمنٹ تون اوار ایلو بشخ آتیٹی کمک فراوان کیک۔ فروری 2022نا مسٹر گیٹس نا دورہ ءِ پاکستان ءِ یات کرسا ، وزیراعظم اودے تینا آسراتی نا رداٹ دُوارہ پاکستان نا دورہ ءِ کننگ نا سلہ خلک۔