پاکستان و سعودی عرب نا زرگزرانی تعلقداری پوسکن آ دور اٹ پترینگا، ہڑتوم آملک آتا نیام اٹ واپار نا کچ ءِ ودفنگ کن پبی گام گیج کننگک، وزیراعظم محمد شہباز شریف

ریاض۔ 29 اپریل (اے پی پی) وزیراعظم محمد شہباز شریف پارینے کہ پاکستان و سعودی عرب نا زرگزرانی تعلقداری اسہ پوسکن ءُ دور اسے ٹی پترینگانو، بروک آ دے تیٹی ہڑتوم آملک آتا نیام اٹ واپار نا کچ ءِ ودفنگ نا بابت پبی گام گیج کننگک، خصوصی زرکاری سہولت کونسل پیشن نا زرکاری نا مون آ دننگ و زرکارآتے آسراتی فراوان کننگ کن پورو وڑاٹ فعال ءِ۔ اوداخیال آتا درشانیءِ دوشنبے نادے آ سعودی عرب نا وزیر واپار ماجد القصبی تون گپ وتران اٹی کرے ہراجہانی اقتصادی فورم نا خصوصی دیوان نا وخت آ اوڑتون اوڑدہی کرے۔ اوڑدہی ٹی بنجائی وزیر خزانہ و محصولات محمد اورنگزیب ، بنجائی وزیر واپار جام کمال خان، بنجائی وزیر حوالکاری و شینکاری عطاءاللہ تارڑ، بنجائی وزیر پیٹرولیم مصدق ملک و وزیراعظم نا خصوصی کمکار طارق فاطمی ئسک ہم ساڑی ئسر۔ وزیراعظم پارے کہ پاکستان و سعودی عرب نا زرگزرانی تعلقداری اسہ پوسکن ءُ دوراسے ٹی پترینگانے، بروک آ دے تیٹی ہڑتوم آملک آتا نیام اٹ واپار نا کچ ءِ ودفنگ نا بابت پبی گام گیج کننگک، پاکستان اٹ خصوصی زرکاری سہولت کونسل پیشن نا زرکاری نا مون آ دننگ و زرکارآتے آسراتی فراوان کننگ کن پورو وڑاٹ فعالءِ۔ وزیراعظم پارے کہ سعودی عرب نا شونداری وشونہالی ٹی پاکستانی تا کڑد بے کچ اہم مسنے۔ سعودی وزیرواپار پارے کہ ولی عہد و وزیراعظم شہزادہ محمد بن سلمان ناپیدوار پارت آتا رداٹ نن پاکستان ءِ زرکاری و واپار نا بابت اولیت تننگ اٹی اُن، سعودی کاروباری و پوریاگر برادری و زرکارآتا ڈل زوت پاکستان نا دورہءِ کننگ ءُ۔ اونا پاننگ ئس کہ بروک آ اسٹ آن یک و نیم سال اٹی ہڑتوم آملک آتا زرگزرانی و واپاری تعلقداری تے پوسکن آ بڑزی تیا دننگ کن ہدف نا تعین ءِ کننگ انگ ءِ۔ اوپارے کہ ہڑتوم آ ملک آتا ورناو پوسکن آ چین اٹی سعودی پاکستان سنگتی نا بابت جوزہ غاتے پین تالان کننگ نا گرج ءِ۔