راولپنڈی۔ 26اپریل (اے پی پی) اینٹی نارکوٹکس فورس (اے این ایف) منشیات اسمگلنگ نا برخلاف 11 کارروائی تیٹی 90 کلوگرام منشیات دوئی کرسا 8 دوبہ دار ءِ دزگیرکرے۔ اے این ایف ہیڈکوارٹر راولپنڈی آن جاری بیان نار داٹ لاہور بالی پٹ آ قطر آ ہنوک ا مسافر آن 5.3 کلوگرام آئس دوئی کننگا۔ اسلام آباد بالی پٹ آ شارجہ غا ہنوک آ مسافر آن 22 ہیرون آن پُر کیپسول دوئی کننگا، بحریہ ٹاؤن راولپنڈی ٹی کوریئر آفس اٹی برطانیہ غا گدریفوک آ پارسل آن 630 گرام ہیرون دوئی کننگا۔ لاہور اٹی کوریئر آفس اٹی برطانیہ غا گدریفوک آ پارسل آن 32 گرام ہیرون دوئی کننگا۔ راولپنڈی ٹی کوریئر آفس اٹی ارٹ میکو کارروائی ٹی برطانیہ غان گدریفوک آ پارسل آن 8 گرام ویڈ دوئی کننگا۔ ڈیرہ اسماعیل خان آن 22.8 کلوگرام چرس دوئی کننگا۔ اسلام آباد اٹی 2 کارروائی تیٹی 4 دوبہ دار آتیان 34.8 کلوگرام چرس و 4 کلوگرام ہیرون دوئی کننگا۔ رنگ روڈ پشاور اٹی کوریئر آفس اٹی لاہور، شکرگڑھ و پنوعاقل آ گدریفوک آ پارسل آن 14.4 کلوگرام چرس، 2.4 کلوگرام افیم و 800 گرام آئس دوئی کرسا دوبہ دارآتے دزگیرکننگا۔ سکھر اٹی کوریئر آفس اٹی لکی مروت آ گدریفوک آ پارسل آن 5 کلوگرام چرس دوئی کرسا دوبہ دار آتے دزگیرکننگا۔ ترجمان پارے کہ دزگیر دوبہ دار آتا برخلاف انسدادِ منشیات ایکٹ انا رداٹ مقدمہ نوشتہ کرسا جاست وپاست نا بناءِ کننگانے۔
