امریکہ ٹی پاکستان نا سفیر مسعود خان نا دود آن تران

واشنگٹن۔ 26 اپریل (اے پی پی) امریکہ ٹی پاکستان نا سفیر مسعود خان پارینے کہ پاکستان نا ہمسایہ غاتیٹی مخاصمانہ رویہ تخوک آ ملک آک ساڑی ءُ، ہنداسوب آن پاکستان ءِ سوگو دفاعی لائخی تا گرج ءِ۔ اوقطبی کیرولینا نا شار شارلٹ نا ورلڈ افیئر کونسل نا کنڈآن اڈ ہلوک دود ‘‘ایمبیسیڈرسرکل سیریز’’ اٹی اومیت نا درشانی ءِ کرے امریکہ پاکستان تون دفاعی تعلقداری تے برجاتخک۔ او عالم دین، دانشور و رائے عامہ اس ٹہیفوک آتا دا مچی ءِ پارے کہ امریکہ و پاکستان نا نیام اٹ سٹریٹجک شریداری مسنے، ننا نیام اٹ معاہدہ و اختلاف ہڑتوم آک ئسر ولے نن دا ہفت ءُ نیم دہائی تیٹی اسہ ایلونا ثابت قدم شریدار رہینگانن۔ اوپارے کہ نن دا شریداری ءِ برجاتخنگ خوانہ ۔ کونسل نا ‘‘ایمبیسیڈر سرکل سیریز’’ دا ساڑی و مسکوہی سفیر و بڑزکو کہول انا سرکاری عہدیدار آتے موقع فراوا کیک ہرا امریکہ و مچ آ دنیانا ملک آتا نیام اٹ سفارتی تعلقداری تا بارواٹی تینا بصیرت نا شریداری کننگ کن شارلٹ شار انا دورہ ءِ کیرہ۔ پاکستانی سفیر پارے کہ دہشت گردی ناخطرہ داسہ ہم ارے، دا ختم متنے انتئے کہ امریکہ (اوغانستان آن) پدی بسنے۔ مسعود خان مستی پارے کہ دا نئے بیرہ پاکستان و اوغانستان کن بلکن ڈیہہ اٹی امریکہ و اونا سیوتی تیکن ہم اسہ خطرناک ءُ خطرہ اسے۔ اوپارے کہ پاکستان و امریکہ غٹ سفارتی ذریعہ و ایلوپرامن ذریعہ اٹ علاقائی امن و سوگوی کن بایدے کاریم کیر۔ اومستی پارے کہ نن غیرفوجی گڑاتا واپار و زرکاری ءِ کینو پاکستان اٹ امریکہ نا براہ راست درملکی زرکاری (ایف ڈی آئی) ءِ ودفنگے۔ اوداہیت آ زور شاغساپارے کہ پاکستان و امریکہ نا نیام اٹ تعلقداری سوگو ءِ، پاکستان نئے بیرہ فوج انا رکھ کشنگ اٹ بلکن 75 ہزار اوغان شاری تا ہمپ و بٹ  اٹی ہم امریکہ نا کمک ءِ کرے۔