قومی زرگزران ءِ نسخان تروک آ زموارآتا احتساب مریک، ٹوبیکو، کھد و سرمٹ فیکٹری تیٹی ٹریک اینڈ ٹریس سسٹم نا معاہدہ ٹی فراڈ نا جاست وپاست کن کمیٹی اس جوڑ کننگ نا پرمان کرینن، وزیراعظم نا کابینہ نا دیوان آن تران

اسلام آباد۔ 26 اپریل (اے پی پی) وزیراعظم شہباز شریف پارینے کہ قومی زرگزران ءِ نسخان تروک آ وڈی خور و ڈوہدار غفلت نا مرتکب زموار آتا احتساب  ءِ کننگک، ٹوبیکو، کھد وسرمٹ فیکٹری تیٹی ٹریک اینڈ ٹریس سسٹم نا معاہدہ ٹی فراڈ نا جاست وپاست کن کمیٹی اس جوڑ کننگ نا پرمان کرینن، ٹریک اینڈ ٹریس سسٹم نا معاہدہ سوائے فراڈآن ہچ اس اف، زرگزرانی اصلاحات نا ایجنڈاغاعمل کننگ اُن، حکومت نا مثبت گام گیج آتیان برآمد و زرراہی تس اٹی ودکی مسنے، بجلی دُزی نا توننگ و زرکاری ٹی ودکی کن کوشست کننگ انگ ءِ، نجکاری نا عمل شفاف مریک، ملک انا فائدہ ٹی سخت فیصلہ کروئی تمک و اوفتیا پہرہ ہم تروئی مریک۔ جمعہ نادے آ بنجائی کابینہ نا دیوان آن تران کرسا وزیراعظم پارے کہ 2019 اٹی ٹریک اینڈ ٹریس سسٹم نا معاہدہ کننگا، اولیکو ریسہ ٹی سگریٹ نا مینو فیکچرنگ فیکٹری تیٹی ٹریک اینڈ ٹریس سسٹم نصب کننگ نا معاہدہ کننگاسس، ولدا کھد و بورہ نا فیکٹری تے ہم داٹی اوار کننگا ولے دا ٹریک اینڈ ٹریس سسٹم سوائے فراڈ آن ہچ اس الوکہ، کل ءِ مالک آتا مرضی آ اِلنگا ، دا بدترین وڑنا ڈوہدار لاپرواہی ءِ۔ وزیراعظم پارے کہ نن سلابت اٹ اسہ لائحہ عمل اس طے کرینن کہ ہرادانا زموارءُ اوفتیان 2019 آن ہلیس اینو اسکان جواب دہی مریک و زمواری نا تعین ءِ کننگک۔ ارب آ کھرب آ روپئی نا ہرا قومی کٹیا بننگ کریکہ، اوفتے زیان کننگانے، دا ملک خداداد پاکستان تون سنگین مسخرہ اس کننگا، 219 اٹی اسہ ہندن ءُ حکومت اس داڑے ئس ہرا ایلوفتیا دوبہ خلککہ ولے بقول تینٹ او پال اٹ سلوک ئسر۔ اوپارے کہ نن تینا زمواری تے پورو کینہ، ٹریک اینڈ ٹریس سسٹم نا جاست وپاست کن کمیٹی اس جوڑکرینن، 72 گھنٹہ ٹی داڑآ سخت ایکشن ہلنگک، داڑآن بدترین فراڈ نا پین انت دروراس مننگ کیک کہ معاہدہ ٹی پینلٹی نا شق ءِ ہی شاغنگتنے، نن داوڑنا کاروباری و سیاسی زند اٹی معاہدہ مہالو اسُل خنتنون۔ وزیراعظم پارے کہ منہ دے مست پاکستان نا زرگزرانی حالیت آتا بارواٹی اسہ رپورٹ اس شینک مس ہرانا رداٹ چندی بشخ آتیٹی ننا ٹک آک جوان مسنو، مارچ اٹی آئی ٹی نا برآمد آک بڑزکو انگا کہول آ مسنو، ہندا وڑ ساڑی آ تُوتیٹی زرراہی تس نا کچ اٹی ودکی مسنے۔ اوپارے کہ ننا حکومت ءِ بروک یک و نیم یا پونے اِراتُومسنے، داکان مست نگران حکومت کاریم کریکہ، نن اواری اٹ ہرا اجتماعی کوشست آتے کرینن اوڑآن حالیت آک کرار کرا ر آ جوان مننگ اٹی ءُ ولے داسکان بھاز خواری نا گرج ءِ، ننا اصلاحات و تنظیم نو نا ایجنڈا ءِ و ملک ءِ ہرا ویل مون تروک ءِ اوفتا سرجیکل آپریشن آن ہی خاتمہ مریک ۔ وزیراعظم پارے کہ توانائی نا بشخ انا جاچ ءِ ہلنگانے، بجلی دُزی نا توننگ کن کوشست کننگ انگ ءِ، ٹرانسمیشن سسٹم اٹی بھاز زیات لاسز ءُ اوفتے گچین کننگ و اڑزآن بجلی نا فراوانی کن کوشست کننگ اُن تقسیم کار کمپنی تا بابت ہم فیصلہ مسنے داباندات ایس آئی ایف سی و ولدا کابینہ ٹی پیش کننگک۔ وزیراعظم پارے کہ ملک انا فائدہ ٹی سخت فیصلہ کروئی تمک و اوفتیا پہرہ تروئی تمک، انشاء اللہ دے ونن خواری کرسا یکسوئی و امنائی اٹ ملک انا کشتی ءِ کنارہ کینہ۔ وزیراعظم پارے کہ ڈیرہ اسماعیل خان اٹی کسٹمز نا 8 کارندہ اسمگلرآتا مقابلہ ءِ کرسا شہید مسنو، اسمگلنگ ہم داڑتون گنڈوک اسہ است ہسون ءُ کِسہ اسے، ایف بی آر ارب آ کھرب آ روپئی کٹیاکیک، داپیسہ غاک خزانہ ٹی ضرور بریرہ، اگہ بتور تو حکومت کننگ نا ہچ ءُ حق اس اف۔ وزیراعظم پارے کہ اوتدوک آ دے ایبٹ آباد نا دورہ ءِ کرے و شہید نا باوہ تون اوڑدہی مس، اوفتا حوصلہ و صبر انا دادایتیوہ، ننے اواری اٹ پاکستان نا خذمت ءِ کروئی ءِ، داسہ یا اسُل مفروک آ باندات ءِ، نن تینا زمواری تے پورو کینہ، وزیراعظم پارے کہ سعودی عرب و ایلو ملک آتون زرکاری اتنگ کن گپ وتران چلینگ انگ ءِ ، نجکاری پلان آ ہم ترندی اٹ عمل مننگ ءِ ، پاکستان اٹی ہم پنچ چار بھلو گروپ داٹی عمل اٹی بشخ ہلنگ نا خواہندار ءُ نجکاری نا عمل شفاف مریک اسہ اسہ پائی نا نن امین مرینہ و قوم ءِ جوابدہ مرینہ۔