اسلام آباد۔ 24اپریل (اے پی پی) پاکستان وجاپان بڑزکو کہول انا اقتصادی پالیسی ڈائیلاگ نا بروک آ دیوان ءِ زوت بٹنگ آ امنا کریر۔ داامنائی سلاہ چارشنبے نادے آ بنجائی وزیر اقتصادی امور احدخان چیمہ و پاکستان اٹی جاپان نا سفیر واڈا متسوہیرونا نیام اٹ اوڑدہی ٹی مس۔ جاپان انٹرنیشنل کوآپریشن ایجنسی نا چیف نمائندہ ناؤنا میاتا و وزارت اقتصادی امور نا بڑزکو آفیسر آک ہم داوخت آ ساڑی ئسر۔ بنجائی وزیر جاپان نا سفیر ءِ بخیرکرے۔ فریق آک پاکستان وجاپان نا نیام اٹ 1954اٹی تینا قیام آن پد آن ہفت دہائی تیا تالان متکن آ ہڑتو م آ کنڈآتا کمکاری ءِ مون آتخا و اونا ستاءِکرے۔ فریق آک تین پہ تینی فائدہ غاتا ہڑتوم آ کنڈآتا و چندی جہانی امور آ گپ وتران کریر و پاکستان کن جاپان نا اقتصادی امدادنا اہمیت آ زور شاغار۔ بنجائی وزیر پارے کہ پاکستان جاپان نا حکومت نا کنڈآن تروک آ اقتصادی امداد ءِ بھاز اہمیت ایتک۔ جاپانی سفیر جان جوڑی ، تعلیم، چاگڑد و دیر کون آ تین پہ تینی امنائی اولیتی بشخ آتیٹی پاکستان نا مخ تفی کن جاپان نا بدل مفروک عزم انا درشانی ءِ کرے۔ اوپارے کہ حکومت جاپان نا کنڈآن فنڈز فراوان کرو ک آ جاری شونداری پورٹ فولیو آ عملدرآمد نا پیش رفت بشمول 2022 نا بھسکار نوکاپ نا رداٹ جاپان نا خصوصی کمکی پیکج و حکومت نا سول سروس آفیسر آتا کاریم نا کچ ءِ ودفنگ کن اسکالر شپ پروگرام نا بارواٹی ہم پارے۔
