اسپیکر قومی اسمبلی تون پرتگال نا سفیرنا اوڑدہی

اسلام آباد۔ 24 اپریل (اے پی پی) اسپیکر قومی اسمبلی سردار ایاز صادق پاکستان و پرتگال نا نیام اٹ پارلیمانی رابطہ غاتے مون آ دننگ نا گرج آ زور شاغسا پارینے کہ داڑآن ہڑتوم آ کنڈآتا تعلقداری پین سوگو مریک۔ داخیال آتا درشانی ءِ او پرتگال نا سفیر فریڈریکو پنہیروداسلواتون گپ وتران کرسا کرے ہرا چارشنبے نادے آ داڑے اوڑتون اوڑدہی کرے۔ اوڑدہی ٹی ساڑی تعلقداری آ است جمی نا درشانی و پین سوگو کننگ نا عزم انا درشانی ءِ کننگا۔ اسپیکر قومی اسمبلی پارے کہ پاکستان پرتگال تون تینا متکن آ دوستانہ تعلقداری تے بھاز اہمیت ایتک۔ اسپیکر قومی اسمبلی ہڑتوم آملک آتیٹی پارلیمانی رابطہ غاتے پین مون آ دننگ نا گرج آ زور شاغا۔ اوپارے کہ ہڑتوم آ ملک آتا نیام اٹ پارلیمانی ڈل آتا ہن و بر و پارلیمانی فرینڈ شپ گروپ نا نیام اٹ رابطہ غان ہڑتوم آکنڈآتا تعلقداری پین سوگو مریک۔ اسپیکر قومی اسمبلی تینا پرتگالی ہم منصب ءِ پارلیمانی ڈل اتون اوار پاکستان نا دورہ  نا سلہ خلک۔ اوپارے کہ پارلیمانی راجی و اقتصادی بشخ آتیٹی کمکاری ہڑتوم آملک آتیکن سودمند ءِ۔ ساڑی حکومت ملک اٹی زرکاری کن سازگار چاگڑد فراوان کننگ اٹ لگوک ءِ، پرتگالی بزنس کمیونٹی پاکستان اٹ زرکاری نا مروک آ بھلو وارخواہی اسے آن فائدہ ہرفنگ کیک۔ پرتگالی سفیر اسپیکر قومی اسمبلی نا تاثرآتیا منت واری نا درشانی ءِ کرساپارے کہ پاکستان ڈیہہ انا اہم ءُ ملک اسے۔