اسلام آباد۔ 24 اپریل (اے پی پی) پاکستان و ایران آجو واپاری معاہدہ ءِ زوت گڈیکو دروشم اس تننگ و اسیجائی اقتصادی ڈٹ، اسیجائی سیمی منڈی تا جوڑ کننگ، اقتصادی فری زون تا کمک اٹ و پوسکن آ سیم تے ملسا تینا ہڑتوم آ کنڈآتا واپار ءِ بروک آ پنچ سال اٹی 10 ارب ڈالر اسکان ودفنگ آ امنا کرینو، وزیراعظم محمد شہباز شریف و ایران نا صدر ڈاکٹر سید ابراہیم رئیسی نا نیام اٹ ڈل آتا کیول آ مروک آ گپ وتران اتی ہڑتوم آ کنڈآتا تعلقداری و کمکاری آ گپ وتران کننگا ہراوزیرخارجہ امیر عبداللہیان ، کابینہ نا ایلو باسک آک و بڑزکو کمامدارآتون اوار اسہ بڑزکو کہولی ڈل اسے تون اوار 22 آن 24 اپریل اسکان پاکستان نا سرکاری دورہ ءِ کریر۔ ہڑتوم آملک آک اسیجائی سیم ءِ ‘‘امن نا سیم’’ آن‘‘شونہالی نا سیم ’’اٹی بدل کننگ آ امنا کرسا توانائی نا بشخ اٹی کمکاری نا اہمیت نا درشانی ءِ کریر۔ ایران نا صدرڈاکٹر سید ابراہیم رئیسی نا دورہ نا ایسر آ چارشنبے نادے آ دفترخارجہ نا کنڈآن جاری اسیجائی بیان اٹی پاننگاکہ فریق آک اسہ مریس مدی پائیدار اقتصادی شریداری و تین پہ تینی کمکاری آ تالان علاقائی اقتصادی و رابطہ نا ماڈل خاص وڑاٹ ایران نا سیستان بلوچستان و پاکستان نا بلوچستان صوبہ غاتیٹی راجی و اقتصادی شونداری نا گرج آ زور شاغار۔ فریق آک پاکستان ایران ہڑتوم آ کنڈآتا تعلقداری نا غٹ پلو آتا جاچ ءِ ہلنگ تون اوار اوار تین پہ تینی گڑتی نا علاقائی و جہانی امور آ گپ وتران کریر و چندی معاہدہ غاتیا دستخط کریر۔ پاکستان وایران علمی، دودوربیدہ ئی و سیل و سواتی سرجزآتے مون آ دننگ و تاریخی مذہبی ہند آتا سیل و سوات ءِ مون آ درسا ہڑتوم آ برادرانہ تعلقداری تے پین سوگو کننگ نا عزم انا درشانی ءِ کریر۔ بیان نا رداٹ ہڑتوم آ راہشونک دہشت گردی، منشیات و انسانی اسمگلنگ ، یرغمال کننگ، منی لانڈرنگ و برمتہ کون آ خطرہ غاتون مون تننگ کن ہڑتوم آملک آتا سیاسی ،فوجی و سیکورٹی کمامدارآتا نیام اٹ باقاعدہ کمکاری و گپ وتران نا اہمیت نا درشانی ءِ کریر۔ فریق آک آجوواپاری معاہدہ(ایف ٹی اے) ءِ ترندی اٹ گڈیکو دروشم اس تننگ کن سالانہ ہڑتوم آکنڈآتا سیاسی سلابت(بی پی سی) و جوائنٹ بزنس ٹریڈ کمیٹی (جے بی ٹی سی) نا بروک آ دیوان آتون اوار اوار اسیجائی اقتصادی کمیشن (جے ای سی) نا مذکرات نا 22 می دور ءِ زوت اڈتننگ آامناکریر۔ بیان نا رداٹ اواقتصادی کمکاری ءِ ترند کننگ کن اقتصادی و تکنیکی چاہندار آتیان بیدس ہڑتوم آملک آتا چیمبرز آف کامرس نا ڈل آتا باقاعدہ ہن و برنا آسراتی فراوان کننگ آہم امناکریر۔ ٹی آئی آرنا رداٹ ریمدان بارڈر پوائنٹ ءِ جہانی سیمی کراسنگ پوائنٹ گوندنگ وبقیہ اِرا بارڈر مارکیٹ آتے ملنگ آ ہم امنا کننگا۔ اقتصادی وواپاری سرجزآتیٹی آسراتی فراوان کننگ کن فریق آتا نیام اٹ بارٹر ٹریڈ میکانزم ءِ پورو وڑاٹ فعال کننگ خاص وڑاٹ جاری کمکاری نا کوشست آتا رداٹ بارڈر اسٹیننس مارکیٹ آتای امنائی سلاہ خننگا، رابطہ نا بابت فریق آک ٹی آئی آر کنونشن نا رداٹ گڑاتا باقاعدہ فراوانی آ است جمی نا درشانی ءِ کریر و مستی گچین، ترند رفتار و اڑاند آتیان پاک واپار کن کنونشن ءِ پورو وڑاٹ فعال کننگ آامناکریر۔ ہڑتوم آملک آک اسیجائی سیم ءِ‘‘ امن نا سیم’’ آن ‘‘ شونہالی نا سیم’’ ٹی بدل کننگ آ امنا کرسا توانائی نا بشخ آتیٹی کمکاری نا اہمیت نا درشانی ءِ کریر ہراٹی بجلی نا فراوانی و ایران پاکستان گیس پیپ لائن ڈٹ آک اوار ءُ۔
