اسلام آباد۔ 23 اپریل (اے پی پی) بنجائی وزیر حوالکاری و شینکاری عطاء اللہ تارڑ پارینے کہ اڈیالہ زندان والا خواجہ نا دور اٹی پاکستان تنیائی نا گواچی ئس، داسہ او باندات چٹانے ، خارجہ پالیسی نا برخلاف ہیت کروک آک مستین نا کِسہ جوڑ مسنو، اوتینا ذات انا خاطر ملک ءِ مدام نسخان تننگ نا کوشست کریر، الس خار و بشخنگ نا بیانیہ ءِ مسترد کرینے۔ سے شنبے نادے آ بنجائی وزیر کانود اعظم نذیر تارڑ تون اوار پریس کانفرنس آن تران کرسا بنجائی وزیر حوالکاری پارے کہ بے گوا بندغ آتا بابت وزیر کانود سرجمی اٹ مون آ تخانے، دہشت گردی نا واقعہ غاتیٹی شہید مروک آتا خاہوت آتا دا بارواٹی بھاز گڑتیک ءُ، اوفک ملک انا خاطر جون تے ندر کریر۔ اوپارے کہ 2011 ٹی سپریم کورٹ بے گوا بندغ آتا بارواٹی انکوائری کمیشن اس جوڑ کریسس ہرانا رداٹ 10023 کیس آتیان 7900 کیس ایسر مسنو، بیرہ 23 درسد درسد پدتموک ءُ۔ اوپارے کہ حکومت دا بابت بھاز انگا کاریم تے کرینے، ننا نیت داویل ءِ ایسر کننگ ءِ۔ اوپارے کہ وزیرکانود مستین نا حکومت اٹی ہم داڑ کاریم کرین، دُوارہ ہم داڑا کاریم مننگ ءِ۔ ضمنی گچین کاری تا نتیجہ غاتا بابت گپ وتران کرسا بنجائی وزیر حوالکاری پارے کہ ضمنی گچین کاری تیٹی دھاندلی نا غوغا کننگا ولے اللہ تعالیٰ نا فضل و کرم اٹ مسلم لیگ (ن) ضمنی گچین کاری تیٹی کلین سویپ کرے۔ اوپارے کہ پاکستان نا الس تحریک انصاف نا دروغ، بیدادی، دفاعی ادارہ غاتا برخلاف بیانیہ ءِ مستردکرینے۔ اوپارے کہ ضمنی گچین کاری تیٹی مسلم لیگ (ن) نا ووٹرآتون اوار ایلوفک ہم مسلم لیگ (ن) ءِ وونٹ تسر۔ اوپارے کہ ضمنی گچین کاری تا شفافیت آ کس اس ہور ہرفنگ کپک، ضمنی گچین کاری 8 فروری نا گچین کاری تا بابت ہم شک و شبہ غاتے چٹفینے۔ اوپارے کہ محمد نواز شریف تون مخلوق نا والہانہ مہرومریبت ءِ، الس شہباز شریف نا زرگزرانی اصلاحات وپنجاب اٹی خذمت نا سیاست ءِ وونٹ تسنو۔ اوپارے کہ خار، منافقت و دروغ آتا لان بیانیہ مسترد مسنے۔ بنجائی وزیر حوالکاری پارے کہ بشریٰ بی بی نا جان جوڑی نا بابت تحریک انصاف مضحکہ خیز پروپیگنڈا کننگ ءِ، بشریٰ بی بی نا غٹ طبی ٹیسٹ درست بسر، او جان جوڑ ءِ، اوپارے کہ اگہ بشریٰ بی بی نا جان جوڑی نا بابت گڑتی اس ارے تو پاش آن پاش پاننگے، ہراتم بشریٰ بی بی نا ٹیسٹ ءِ کننگک تو او جان جوڑ ظاہرمریک۔ اوپارے کہ پی ٹی آئی دروغ آ تالان مہم چلیفنگ ءِ کہ بشریٰ بی بی نا زند ءِ خطرہ ءِ۔
