اسلام آباد۔ 23 اپریل (اے پی پی) پاکستان اٹی اقوام متحدہ نا چناتا فنڈ (یونیسیف) نا نمائندہ عبداللہ اے فادیل سے شنبے نادے آ بنجائی وزیر بنجائی تعلیم و کسبی تربیت ڈاکٹر خالد مقبول صدیقی تون اوڑدہی کرے۔ اوڑدہی ٹی سیکرٹری تعلیم محی الدین وانی ہم شریک ئس۔ بنجائی وزیر ڈاکٹر خالد مقبول صدیقی عبداللہ اے فادیل نا خیرمقدم ءِ کرے و پاکستان نا تعلیمی بشخ اٹی یونیسیف نا خذمت آتا اعتراف ءِ کرے۔ داوخت آ او پاکستان نا الس کن آب اٹ تعلیم اسکان بریبر رسینگ ودی کننگ کن پاکستان نا کمک کننگ اٹ یونیسیف نا کڑد انا ستاءِ کرے۔ بنجائی وزیر پارے کہ اسکول آتیان پیشن چناتا ویل و تعلیم اسکان رسینگ و آب انا گیشتر پرخ ءِ ہلہلہ ئی بنداوتیا مر کننگ نا سخت گرج ءِ۔ ڈاکٹر خالد پارے کہ وزارت تعلیم اسہ قومی تعلیمی فریم ورک اس جوڑ کننگ کن اسہ جوان ءُ ڈٹ اسے آ کاریم کننگ اٹی ءِ ہرانا رداٹ بنجا و صوبہ بریبر نا اسٹیک ہولڈر مریرہ۔ وزیرپارے کہ دا فریم ورک اسہ تُو انا تہہ ٹی بناکننگک و غٹ اسٹیک ہولڈرآتے اسہ پنہ غا اتنگک۔
