ملک ءِ مون تروک چیلنج آتون مون تننگ کن مربوط کوشست آتون گچین حکمت عملی اس اختیارکروئی مریک، چیئرمین سینیٹ

اسلام آباد۔ 23 اپریل (اے پی پی ) چیئرمین سینیٹ سید یوسف رضاگیلانی پارے کہ ملک ءِ مون تروک چیلنج آتون مون تننگ کن مربوط کوشست آتون حکمت عملی اس اختیارکروئی مریک، موسمیاتی تغیرات مچ آ دنیا کن اسہ بھاز بھلو چیلنج اس جوڑ مسنے، سوشل سیفٹی نیٹ ورک و وسیلہ غاتا گچین کاریم اٹ اتنگ نا بابت حکمت عملی المی ءِ۔ داخیال آتا درشانی ءِ او اسلام آباد اٹی اڈ ہلوک بزنس سمٹ اٹی بطور مہمان خاص تران کرسا کرے۔ اوپارے کہ یونٹی فوڈز، نٹ شیل گروپ نا کنڈآن بزنس سمٹ اٹی لیڈرز نا 7 می ایڈیشن اسہ گچین ءُ پلیٹ فارم اس جوڑ مریک۔ ای دا اہم فورم آ بٹنگ آ نما غٹ انا منت وار اُٹ ہراٹی مچ آ دنیا نا سرسہب پوریاگر و زرکار و کاروباری خواجہ غاک ساڑی ءُ۔ چیئرمین سینیٹ سید یوسف رضاگیلانی پارے کہ اومیت ءِ کہ دا سمٹ نا دوررس نتیجہ مون آ بریک۔ ننے ملکی زرگزران و ایلو چیلنج آتون مون تننگ و اقتصادی شونداری کن گچین حکمت عملی اس اختیار کروئی مریک۔ اومیت ءِ ملک ءِ سیکورٹی، زرگزرانی ، چاگڑدی، راجی و خاص وڑاٹ آبادی ٹی ہوشربا ودکی تون مون تننگ کن دا پلیٹ فارم آن گچین سلاہ دُوبریک۔ چیئرمین سینیٹ پارے کہ ملک ءِ مون تروک چیلنج آتون مون تننگ کن مربوط کوشست آتون گچین حکمت عملی اس اختیارکروئی مریک و خاص وڑاٹ دہشت گردی نا برخلاف و علاقائی سوگوی نا کنڈآ خصوصی چکار کروئی مریک۔ اوپارے کہ ملکی زرگزرانی حالیت آتیٹی گچینی ، کبینی، بے روزگاری و نیزگاری نا چٹفنگ کن پوریاگر برادری و کاروباری خواجہ غاتے تینا کڑد ءِ ادا کروئی مریک۔  حکومت و پوریاگر آتا نیام اٹ کمک و گچین حکمت عملی زرگزرانی بحالی نا ضامن ءِ۔ زرگزرانی ویل آتون مون تننگ کن سازگار چاگڑد المی ءِ۔ ملک اٹی دہشت گردی نا واقعہ غاتا بابت چیئرمین سینیٹ پارے کہ پاکستان دہشت گردی نا برخلاف جنگ اٹی بے شمار جونی و مالی قربانی تسنے۔ سید یوسف رضاگیلانی مچ آ دنیا ءِ مون تروک موسمیاتی تغیرات نا بابت پارے کہ موسمیاتی تغیرات مچ آ دنیا کن اسہ بھا ز بھلو چیلنج اس جوڑ مسنے۔ پاکستان ہم ترند انگا چاگڑدی تغیرات آن زہمی ملک آتا فہرست اٹی اوارءِ۔