اسپیکر قومی اسمبلی تون سعودی عرب نا سفیر نا پارلیمنٹ ہاؤس اٹی اوڑدہی

اسلام آباد۔ 23 اپریل (اے پی پی) اسپیکر قومی اسمبلی سردار ایاز صادق تون سے شنبے نادے آ سعودی عرب نا سفیر نواف بن سعید احمد المالکی پارلیمنٹ ہاؤس اٹی اوڑدہی کرے ہراٹی ہڑتوم آ کنڈآن پاک سعودی تعلقداری تیا است جمی نا درشان و اوفتے پین ودفنگ نا عزم انا درشانی ءِ کننگا۔ اسپیکر سعودی سفیر تون گپ وتران کرسا پارے کہ پاکستان سعودی عرب تون تینا متکن آ ایلمی تعلقداری تے بھاز اہمیت ایتک۔ پاک سعودی تعلقداری مذہب، دودوربیدہ، تاریخ و تین پہ تینی و شرف نا اٹوٹ رشتہ غاتیٹی تفوک ءُ۔پاکستان نا الس سعودی عرب و خادمین حرمین الشریفین تون وابستگی تخک۔ اوپارے کہ ہڑتوم آ ایلم ملک آک اہم جہانی و علاقائی ایشوتیا اسہ وڑ موقف تخرہ۔ ہڑتوم آکنڈآتا تعلقداری تے پین سوگو کننگ کن پارلیمانی سفارتکاری بھاز اہمیت تخک۔ پارلیمانی ڈل آتا ہن و بر و پارلیمانی فرینڈ شپ گروپ آتا نیام اٹ رابطہ ہڑتوم آ قوم تے پین خڑک اتنگ اٹ کمکار مریک۔ ہڑتوم آ ایلم  اسلامی ملک آک مشکل وخت اٹی مدام اسہ ایلو تون تفینو۔ سعودی عرب نا پاکستان نا زرگزرانی و اقتصادی شونداری کن کمک ستاکڑزک۔ سعودی عرب نا کنڈآن پاکستان اٹی زرکاری نا عزم انا خیرمقدم ءِ کینہ۔ پاکستان اٹ پیشن نا زرکاری نا بھلو وارخواہی ا س ساڑی ءِ۔ اسپیکر قومی اسمبلی سعودی عرب اٹی رہینگوک پاکستانی پردیسی تے آسراتی تا فراوانی آ سعودی حکومت نا منت واری ءِ ہرفے۔ اسپیکر قومی اسمبلی سعودی مجلس شوری نا چیئرمین ڈاکٹر عبداللہ بن محمد بن ابراہیم الشیخ ءِ پارلیمانی ڈل اتون اوار پاکستان نا دورہ نا سلہ خلک۔ سعودی سفیر نواف سعید المالکی اسپیکر قومی اسمبلی نا کنڈآن سعودی عرب تون گہری وابستگی ، خادمین حرمین الشریفین کن نیک است خواہی نا درشان و ہڑتوم آ کنڈآتا تعلقداری تے ودفنگ نا است خواہی نا درشانی آ منت واری ءِ ہرفے و پارے کہ سعودی عرب پاکستان تون تینا ایلمی تعلقداری تے بھاز اہمیت ایتک۔ سعودی عرب نا الس و حکومت پاکستان نا پائیدار شونداری و شونہالی کن کڑد ادا کرساکیک۔