آئی ایم ایف تون تون مریس مدتی پروگرام المی ءِ، وزیرخزانہ نا تران

اسلام آباد۔ 23 اپریل (اے پی پی) بنجائی وزیر خزانہ و محصولات محمد اورنگزیب پارینے کہ آئی ایم ایف تون مریس مدتی پروگرام المی ءِ انتئے کہ آئی ایم ایف وام اکن آخیریکو کسر مریک، پاکستان اسٹاک مارکیٹ تاریخ نا بڑزکو انگا کہول آٹے و کشت وکشار نا بشخ ہم 5 درسد نا کچ آن نموپذیر ءِ، ملکی زرمبادلہ نا کوڑی تیٹی ودکی مسنے و جون اسکان ملکی زرمبادلہ نا کوڑی10 ارب ڈالرا سکان سرمریک، حکومت زرگزران ءِ سوگو کننگ، شونداری نا وارخواہی تے مون آ دننگ، کبینی نا زور انا مون ءِ توننگ و راج انا نزور تپہ غاتے ریلیف فراوان کننگ، درملکی زرکاری ءِ اتنگ و زرگرانی نمو ءِ ترند کننگ کن گام گیج کننگ ءِ، حکومتی گام گیج آتیٹی کرنٹ اکاؤنٹ  نسخان کم مسنے۔ داخیال آتا درشانی ءِ او سے شنبے نادے آ داڑے اسلام آباد بزنس سمٹ 2024 اٹی ‘‘شونداری کن کمک’’ نا سرحال آ تران کرسا کرے۔ اوپارے کہ حکومت زرگزران ءِ سوگو کننگ و شونداری نا وارخواہی تے مون آ دننگ کن گام گیج کرینے۔ کشت وکشار و صنعت نا کارکڑد اتی گچینی نا گمان ءِ۔ اوپارے کہ جی ڈی پی ٹی مالی سال 2024اٹی 2.6 درسد ودکی نا گمان ءِ۔ افراط زر انا کچ 24 درسد مننگ نا کساس ءِ، ہراکہ مالی سال 2023 اٹی 29.2 درسد آن کم ءِ۔ کرنٹ اکاؤنٹ نسخان و مالیاتی نسخان پائیدار دنگ آتیٹی مننگ نا گمان ءِ۔ حکومت کشاری بشخ انا کارکڑد ءِ گچین کننگ کن گام گیج کرینے۔ اوپارے کہ اہم فصل آتا پیدوار غیرمعمولی ءِ۔ جولائی آن فروری 2024 اٹی کشاری وام تا بشخنگ اٹ 33.6 درسد ودکی مس۔ گچین فصل آتا سوب آن صنعتی بشخ آ مثبت اثر مرتب مریک۔ وزیرخزانہ پارے کہ حکومت افراط زر انا مون ءِ توننگ کن گام گیج کرینے۔ سی پی آئی افراط زر مارچ 2024 اٹی 20.7 درسد سالانہ غا سرمس ہرا تدوک آ سال انا ہندا تُو 35.4 درسد ئس۔ حکومت کبینی نا مون ءِ توننگ و راج انا نزور تپہ غاتے ریلیف فراوان کننگ کن گام گیج کننگ اٹی ءِ۔ اوپارے کہ حکومتی گام گیج آتا سوب خراج وصولی ٹی ودکی مسنے۔ جولائی آن مارچ 2024 اٹی ایف بی آر نا خراج وصولی ٹی 30.2 درسد ودکی مس۔ ایف بی آر 6707 بلین روپئی نا مقررہ ہدف آن زیات جمع کرے۔ حکومت نا فعال گام گیج وشونداری شریدار آتون گچین ہم گرنچی نا سوب آن زرگزرانی نقطہ نظر مثبت ءِ۔ وزارت خزانہ، ایف بی آر و وزارت کانود نا کمک اٹ اواری اٹ محصولات نا ودکی کن گام گیج کننگ ءِ۔ اومستی پارے کہ حکومتی گام گیج آتا سوب خراج وصولی ٹی ودکی مس، کرنٹ اکاؤنٹ نسخان کم مسنے، پالیسی ریٹ برقرارتخنگانے، مالی سال 2024 اٹی جی ڈی پی ٹی ودکی نا گمان ءِ، کرنٹ اکاؤنٹ و مالیاتی نسخان ءِ جوان دنگ ات تخنگ نا ہدف تخانے۔ محمد اورنگزیب پارے کہ حکومت درملکی زرکاری ءِ اتنگ کن گام گیج کننگ اٹی ءِ ، توانائی نا بشخ اٹی اصلاحات و نسخان اٹ چلینگوک آ ادارہ غاتا نجکاری المی ءِ۔