صدر مملکت آصف علی زرداری تون پاکستان نیشنل ہارٹ ایسوسی ایشن (پناہ) نا ڈل انا اوڑدہی

اسلام آباد۔ 23 اپریل (اے پی پی) صدر مملکت آصف علی زرداری پاکستان اٹ است انا ناجوڑی تیان بچنگ کن آگاہی ودی کننگ نا گرج آ زور شاغسا پارینے کہ نے امراض قلب آن بچفنگ کن جوان کوشست کروئی مریک۔ ایوان صدر نا پریس ونگ آن جاری بیان نا رداٹ صدر مملکت داخیال آتا درشانی ءِ پاکستان نیشنل ہارٹ ایسوسی ایشن (پناہ) نا ڈل اتون اوڑدہی ٹی گپ وتران کرساکرے ہرا میجر جنرل (ر) مسعود الرحمان نا کماشی ٹی سے شنبے نادے آ داڑے ایوان صدر اٹی اوڑتون اوڑدہی کرے۔ اوپارے کہ امراض قلب آن بچنگ کن مخلوق اٹ جان جوڑ زند انا وڑانا بارواٹی آگاہی ودی کننگ نا گرج  ءِ۔ صدر مملکت است انا ناجوڑی تیٹی ودکی آ گڑتی نا درشانی ءِ کرے و پارے کہ امراض قلب و غیرمتعدی مرض آتیان بچنگ نا جوان پروگرام نا گرج ءِ۔ اوپارے کہ کاربونیٹیڈ و ہنین انگا شربت آتیٹی بورہ نا کچ انا بارواٹی ہیلتھ ایڈوائزری نمان کننگ کن گام گیج کننگے۔ ڈل انا سروک صدر مملکت ءِ است انا ناجوڑی تا تالانی نا توننگ، آگاہی ودی کننگ اٹ پناہ نا کڑد انابارواٹی پارے۔ اوحوال اٹی معلومدار کرے کہ پناہ انجائنا و ہارٹ اٹیک نا سوب آن مروک آ مرک آتا توننگ، کم کننگ و کنٹرول کننگ نا کوشست کننگ ءِ۔ صدر مملکت جان جوڑی طرز زند انا مون آ دننگ اٹ پناہ نا کڑد انا ستاءِ کرے۔