وزیراعظم محمد شہباز شریف نا برطانیہ نا پنی آ جامعہ غاتا نمائندہ ڈل اتون گپ وتران

اسلام آباد۔ 23 اپریل (اے پی پی) وزیراعظم محمد شہباز شریف پارینے کہ آب اٹ تعلیم نا مون آ دننگ حکومت نا اولیت ءِ، ننا پبی کوشست ءِ کہ اسہ چناس ہم اسکول آتیان پیشن مف، دا بابت بنجائی حکومت صوبائی حکومت آتون اواری اٹ کاریم کننگ اٹی ءِ۔ پاکستان و برطانیہ نا تعلقداری دہائی تیا تالان ءِ ہرافتے ٹی وخت اتون اوار اوار پین گچینی بننگ ءِ، نن برطانیہ تون واپار و تعلیم نا بشخ آتیٹی کمکاری ءِ ودفنگ نا خواہندار اُن۔ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف تون برطانیہ نا پنی آ جامعہ غاتا نمائندہ غاتا ڈل سے شنبے نادے آ اسلام آباد اٹی اوڑدہی کرے۔ ڈل انا کماشی ءِ برطانیہ نا انٹرنیشنل ایجوکیشن چیمپیئن سر اسٹیواسمتھ کریکہ۔ اوڑدہی ٹی بنجائی وزیر تعلیم خالد مقبول صدیقی، قومی اسمبلی نا باسک رومینہ خور شید عالم، وزیراعظم نا خصوصی کمکار طارق فاطمی ، پاکستان اٹی برٹش کونسل نا کنٹری ڈائریکٹر جیمز ہیمپسن ، چیئرمین ہائر ایجوکیشن کمیشن و تعلقدار بڑزکو سرکاری آفیسر آک ہم ساڑی ئسر۔ وزیراعظم ڈل ءِ پاکستان اٹ بخیراٹ پارے۔ ڈل اتون گپ وتران کرسا وزیراعظم پارے کہ آب اٹ تعلیم نا مون آ دننگ ننا حکومت نا اولیت ءِ۔