اسلام آباد۔ 22 اپریل (اے پی پی) وزیراعظم نا کوآرڈی نیٹر موسمیاتی بدلی و چاگڑدی رابطہ رومینہ خورشید عالم پلاسٹک نا کچٹی تون مون تننگ و ڈغار ءِ پلاسٹک نا لعنت آن بچفنگ کن ہرممکنہ گام ءِ عملی دروشم اس تننگ کن غٹ انا یکجا مننگ نا گرج آ زورشاغانے۔ وزیراعظم ناپارت نا رداٹ اوشاری، تنظیم و حکومتی ادارہ غاتا کنڈآن پلاسٹک نا کاریم اٹ اتنگ آن کرہ ارض ءِ لاحق خطرہ نا برخلاف جنگ اٹی یکجا مننگ کن مربوط کوشست آتا اہمیت آ زور شاغا۔ وزیراعظم نا کوآرڈی نیٹر وزارت و اوڑتون گنڈوک تنظیم تا دیوان تا کماشی ءِ کرے تانکہ دا گام گیج آتا جاچ ءِ ہلنگ مرے ہرا او ارتھ ڈے اکن المی گوندنگاسر، ہراکہ مچ آ دنیا ٹی و پاکستان اٹی اڈتننگ انگ ءِ، داوخت آ‘‘ڈغار بمقابلہ پلاسٹک’’ نا سرحال نا رداٹ اڈتننگ کن سرجزآتا اسہ ہفتہ مرغن ءُ چرجوئی اس طے کننگانے۔ اوسینئر آفیسر آتے پارت کرینے کہ او چندی السی سیل و سواتی ہند آتا اناگت دورہ ءِ کیر و پلاسٹک نا کاریم اٹ اتنگ نا برخلاف گام گیج آتا نفاذ نا بارواٹی رپورٹ کیر۔ پلاسٹک نا ممانعت کن سائن بورڈ انا کچ ءِ ودفنگ نا گرج آ زور شاغسا ، او الس اسکان پیدوار کلہو رسینگ نا اہمیت ءِ تالان کرے۔
