اسلام آباد۔ 22 اپریل (اے پی پی) وزیراعظم محمد شہباز شریف و اسلامی جمہوریہ ایران نا صدر ڈاکٹر سید ابراہیم رئیسی دوشنبے نادے آ داڑے ہڑتوم آکنڈآتا و علاقائی امور آ سرجمی اٹ گپ وتران کریر۔ دفترخارجہ نا کنڈآن جاری بیان نا رداٹ ہڑتوم آ راہشونک بھلو کچ اسے آ ہڑتوم آ کنڈآتا کمکاری ءِ ودفنگ خاص وڑاٹ واپار ، توانائی ، رابطہ ، دودوربیدہ و الس تون الس نا رابطہ غاتا بشخ آتیٹی کمکاری ءِ ودفنگ نا عزم انا درشانی ءِ کریر۔ اوغزہ نا حالیت آتیا گڑاتی نا درشانی ءِ کریر و دمدستی و غیرمشروط جنگ بندی، محاصرہ ءِ چٹفنگ و غزہ نا مخلوق ءِ انسانی بنداوتیا امداد فراوان کننگ کنم جہانی کوشست آتیا زور شاغار۔ وزیراعظم کشمیری الس و اوفتا روا حق آتیکن ایران نا پیدوار و اصولی مخ تفی آ ایرانی سرکڑدہ غاتا ستاءِ کرے۔
