اسلام آباد۔ 22اپریل (اے پی پی) پاکستان وایران سیکورٹی ، واپار، سائنس و ٹیکنالوجی ، ویٹرنری ہیلتھ، دودوربیدہ و عدالتی امور تون اوار چندی بشخ آتیٹی کمکاری نا مون آ دننگ کن 8 معاہدہ و مفاہمت نا یات داشت آتیا دستخط کریر۔ دستخط آتا دود دوشنبے نادے آ وزیراعظم ہاؤس اٹی اڈ ہلک۔ داوخت آ وزیراعظم شہباز شریف و ایران نا صدر ڈاکٹر سید ابراہیم رئیسی ئسک ہم ساڑی ئسر۔ ہڑتوم آ ملک آتا نیام اٹ سیکورٹی نا بشخ اٹی کمکاری نا معاہدہ غاتے پک کننگا۔ سول باندات آتیٹی کمکاری کن عدالتی کمکاری نا معاہدہ غا بنجائی وزیر کانود وانصاف اعظم نذیر تارڑ و ایرانی نا وزیر انصاف امین حسین رحیمی ئسک دستخط کریر۔ ہڑتوم آملک آتا نیام اٹ ویٹرنری و حیوانات نا جان جوڑی نا بشخ اٹی کمکاری نا معاہدہ غاتیا ہم دستخط کننگا۔ معاہدہ غا نیشنل فوڈ سیکورٹی اینڈریسرچ نا وزیر رانا تنویر حسین و ایران نا وزیر کشت وکشار جہاد محمد علی نیک بخت دستخط کریر۔ پاکستان و ایران نا نیام اٹ جوائنٹ فری اکنامک زون، اسپیشل اکنامک زون نا جوڑ کننگ کن مفاہمت نا یات داشت آ سیکرٹری زرکاری بورڈ عنبرین افتخار و ایران نا سلاہکار صدر و سپریم کونسل آف فری ٹریڈ انڈسٹریل اینڈ اسپیشل اکنامک زونز نا سیکرٹری حجت اللہ عبدالمالکی ئسک دستخط کریر۔ ایران نا وزارت کوآپریٹیو لیبر اینڈ سوشل ویلفیئر و وزارت سمندر پار پاکستانیز و پاکستان نا انسانی وسیلہ غاتا شونداری نا نیام اٹ کمکاری نا اسہ مفاہمت نا یات داشت اسے آ بنجائی وزیر اوورسیز پاکستانیز چوہدری سالک حسین و ایران نا وزیر روڈ و شاری شونداری مہر داد بازرپاش دستخط کریر۔ ہڑتوم آ فریق آک پاکستان اسٹینڈرڈ اینڈ کوالٹی کنٹرول اتھارٹی وزارت سائنس و ٹیکنالوجی و ایران نا نیشنل سٹینڈرڈ آرگنائزیشن نا نیام اٹ کمکاری کن مفاہمت نا یات داشت آ دستخط کریر۔ مفاہمت نا یات داشت آ بنجائی وزیر سائنس و ٹیکنالوجی ڈاکٹر خالد مقبول صدیقی و ایران نا وزیر سڑک و شاری شونداری مہرداد بازرپاش دستخط کریر۔ پاکستان و ایران میوچل لیگل کوآپریشن کن مفاہمت نا یات داشت آہم دستخط کرینو۔ مفاہمت نا یات داشت آ وزیرکانود و انصاف اعظم نذیر تارڑ و وزیر انصاف امین حسین رحیمی دستخط کریر۔ پاکستان نا وزارت حوالکاری و شینکاری و ایران نا آرگنائزیشن آف سینما اینڈ آڈیو ویژوئل افیئرز نا نا نیام اٹ ہڑتوم آملک آتیٹی فلم آتا تبادلہ و کمکاری ءِ مون آ دننگ کن اسہ مفاہمت نا یات داشت اسے آ دستخط کننگا۔ دا ایم اویو آ بنجائی وزیر حوالکاری و شینکاری عطاء اللہ تارڑ و ایران نا وزیر دودوربیدہ و اسلامی راہشونی محمد مہدی اسماعیلی دستخط کریر۔
