اسلام آباد۔ 22 اپریل (اے پی پی) پاکستان و ایران واپار و مواصلاتی رابطہ غاتون اوار چندی بشخ آتیٹی کمکاری ءِ مون آ دننگ و دہشت گردی نا چٹفنگ کن اسیجائی کوشست آتیا امنا کرینو۔ داامنائی سلاہ دوشنبے نادے آ وزیراعظم ہاؤس اٹی وزیراعظم محمد شہباز شریف و ایران نا صدرڈاکٹر سید ابراہیم رئیسی نا نیام اٹ اوڑدہی ٹی مس۔ وزیراعظم ہاؤس آ بننگ آ وزیراعظم شہباز شریف ایرانی صدر ءِ بخیرکرے۔ ہڑتوم آ راہشونک اسہ ایلو کن نیک است خواہی نا درشانی ءِ کریر۔ وزیراعظم اوڑدہی ٹی پارے کہ لس گچین کاری تیان پد نی اولیکو سروک مملکت اُس ہرا پاکستان نا دورہ ءِ کننگ اٹی اُس، کنتون اوار مچ آ پاکستانی قوم نا دا دورہ نا خیرمقدم ءِ کیرہ۔ ایرانی صدر جم و جوش اٹ بخیر کننگ آ وزیراعظم نا منت واری ءِ ہرفے۔ ہڑتوم آ راہشونک ایران پاکستان ہڑتوم آ کنڈآتا تعلقداری نا مون آ سدننگ چندی بشخ آتیٹی کمکاری ، واپار و مواصلاتی رابطہ غاتے ودفنگ نا بابت گپ وتران کریر۔ ہڑتوم آ راہشونک دہشت گردی نا چٹفنگ کن ہڑتوم آملک آتا کنڈآن اسیجائی کوشست آتیا امنا کریر۔
