اسلام آباد۔ 22 اپریل (اے پی پی) پاکستان و ایران ہڑتوم آ کنڈآتا واپاری کچ ءِ 10 ارب ڈالر اسکان ودفنگ آ امنا کرسا پارینو کہ ہڑتوم آ ملک مذہب، دودوربیدہ ، تہذیب و ہمسائیگی نا رشتہ غاتیٹی تفوک ءُ، وخت بسنے کہ ایران، پاکستان نا تعلقداری تے پین سوگو کننگے، ننا سیم تیا شونداری و شونہالی نا مینار جوڑ مرے و اوفتے کاروبار، شونہالی و نظربروک شونداری ٹی بدل کین، اقوام متحدہ و اقوام عالم غزہ ٹی انسانیت سوز ظلم آتا چٹفنگ کن تینا کڑد ءِ ادا کیر، پاکستان و ایران مدام کشمیری و فلسطینی تا حق خودارادیت نا جہد نا مخ تفی ءِ کرینو۔ دوشنبے نادے آ ایران نا صدر سید ابراہیم رئیسی نا دورہ ءِ پاکستان نا وخت آ چندی بشخ آتیٹی کمکاری کن مفاہمت نا یات داشت آتیا دستخط نا دود آن پد میڈیا تون گپ وتران کرسا وزیراعظم شہباز شریف پارے کہ ایرانی صدر ایلم ملک ایران آن اولیکو مہمان ءِ ہرا ننا حکومت آن پد بطور صدر، پاکستان نا اولیکو دورہ ءِ کننگ ءِ، دا ننکن شرفمندی نا ہیت اسے۔ اوپارے کہ ہڑتوم آ ایلم اسلامی ملک آتا نیام اٹ مذہب، دودوربیدہ و تہذیب نا رشتہ، سفارتی، زرکاری، سیکورٹی نا تعلقداری آ سرجمی اٹ گپ وتران مسنے۔ اوپارے کہ ایران نا پاکستان تون تعلقداری پیڑی تیا ن متکن ءِ، پاکستان نا جوڑ مننگ آ ن مست برصغیر نا مسلمان تا ایرانی تتون خڑکی تعلقداری ئس ، داتعلق ءِ ننے اینو شونداری و شونہالی و تین پہ تینی مہرومریبت و ہڑتوم آ ملک آتا گچینی کن کاریم اٹ اتنگ ءِ، 1947ء ٹی ایران پاکستان ءِ امنا مروک آ ملک آتیٹی سرفہرست ئس۔ وزیراعظم پارے کہ ایران نا شار تہران و مشہد بھاز زیبا ءُ۔ اوایرانی صدر ءِ پارسا پارے کہ گوکہ ننا شاعر علامہ اقبال نما انقلابی جوزہ غاتے سوگوی ایتک تو حافظ و خیام آن بیدس ننا سوچ انا دنگ ہم بے پورو ءِ۔ 2009ء ٹی ایران نا دورہ نا  حوالہ ءِ ترسا اوپارے کہ داوخت آ ہموڑے اقبال چیئر اس جوڑ مس، ولدا پنجاب اٹی فردوسی چیئرجوڑ مس، لاہور جوہر ٹاؤن  نا اہم شاہراہ تے فردوسی تون گنڈنگاسس۔ اوپارے کہ ایرانی صدر نا مدبرانہ کماشی ٹی ایرانی بھاشون ہلکنے، وخت بسنے کہ ایران، پاکستان نا تعلقداری تے پین سوگو کننگے، ننا سیم تیا شونداری وشونہالی نا مینار جوڑ مرے و اوفتے کاروبار، شونہالی و نظر بروک شونداری ٹی بدل کین، اینونادے دا موقع فراوان کننگ ءِ کہ دا ہمسائیگی و تینا سنگتی ءِ شونداری وشونہالی نا سمندر اٹی بدل کین۔ اوپارے کہ اینو نن اقتصادی شونداری و رابطہ غاتا بابت ہرافیصلہ غاتے کرینن او مون آ بریرہ۔ اوپارے کہ غزہ نا مسلمان تیا ظلم انا زی آ ظلم کننگ انگ ءِ، داڑآ ایران تینا پبی موقف اختیارکرینے، پاکستان دا چرجوئی ٹی غزہ نا مسلمان و ایڑھ تتون سلوک ءِ۔