پیٹرولیم مصنوعات نا نہاد آتیٹی ساڑی آ ودکی جہانی مارکیٹ اٹی نہاد آتے مون آ تخسا کننگانے، بنجائی وزیر کانود و پارلیمانی امور

اسلام آباد۔ 19 اپریل (اے پی پی) بنجائی وزیر کانود و پارلیمانی امور اعظم نذیر تارڑ پارینے کہ پیٹرولیم مصنوعات نا نہاد آتیٹی ساڑی آ ودکی جہانی مارکیٹ اٹی نہاد آتے مون آتخسا کننگانے، الس آ بھاریم شاغنگ خواپنہ ہرانا سوب آن حکومت سیلز خراج و پیٹرولیم لیوی نا مد اٹی 45 ارب روپئی ءِ تینٹ سگانے۔ جمعہ نادے آ قومی اسمبلی ٹی عالیہ کامران نا پیٹرولیم مصنوعات نا نہاد آتیٹی ودکی نا بابت چکاری نوٹس ناورندی ءِ ترسا بنجائی وزیر کانود و پارلیمانی امور اعظم نذیر تارڑ پارے کہ ننا پیٹرولیم مصنوعات نا ملکی پیدوار کم ءِ ننا غٹ تر دارومدار دا مصنوعات آتا درآمد آٹی ءِ۔ حکومت ہر 15 دے آن پد نہاد آتا جہانی مارکیٹ ءِ مون آتخسا تعین ءِ کیک۔ تدوک آ منہ دے تیٹی چارءُ نیم ڈالر فی بیرل اسکان ودکی مسنے۔ اوپارے کہ داسہ ہم حکومت الس ءِ جوان نہاد آتیا پیٹرولیم مصنوعات نا فراوانی کن سیلز خراج و پیٹرولیم لیوی نا مد اٹی 45 ارب روپئی نا بھاریم ءِ سگانے۔ عالیہ کامران نا سوج انا ورندی ٹی وزیرکانود اعظم نذیرتارڑ پارے کہ نہاد آتا تعین ہر پانزدہ دے آن پد غٹ تر خڑچ و ڈالر نا نہاد ءِ مون آتخسا کننگک۔ حکومت نا داکوشت مریک کہ الس آ کم آن کم بھاریم تمے۔ نعیمہ کشور خان نا سوج انا ورندی ٹی اعظم نذیر تارڑ پارے کہ پیٹرولیم مصنوعات نا نہاد آتیٹی ساڑی آ ودکی 3.82 و 4.30 ڈالر فی بیرل جہانی مارکیٹ اٹی ودکی ءِ مون آتخسا کننگانے۔