اسلام آباد۔ 19 اپریل (اے پی پی) بنجائی وزیر داخلہ محسن نقوی پارینے کہ پولیس تون اوار غٹ سیکورٹی ادارہ غاک چینی شاری تا رکھ انا ایس او پی تیا سد درسد عملدرآمد ءِ پک کیر، درملکی شاری تا رکھ اناایس او پی تیا عملدرآمد اٹ ڈیوالئی آ سخت تادیبی کارروائی کننگک۔ دہشت گردی نا چٹفنگ کن ننے تینا ادارہ غاتے پوسکن آ ٹیکنالوجی آن شپ کروئی مریک، کچے نا علاقہ ٹی اسیجائی آپریشن کننگک۔ او نیکٹا ہیڈکوارٹر اٹی نیشنل ایکشن پلان آعملدرآمد نا جاچ کمیٹی نا اہم دیوان آن تران کریکہ۔ بنجائی سیکرٹری داخلہ، سروک نیکٹا، ڈی جی ایف آئی اے، پنجاب، سندھ ، خیبرپختونخوا ، بلوچستان، آزاد کشمیر، گلگت بلتستان و اسلام آباد نا آئی جیز، سیکرٹریزداخلہ، نیشنل کو آرڈی نیٹر نیکٹا، نیشنل ایکشن پلان و انٹیلی جنس ادارہ غاتا غٹ ٹیم و چیف کمشنر آک ہم دیوان اٹی بشخ ہلکر۔ دیوان اٹی کچے نا علاقہ ٹی آپریشن کننگ نا فیصلہ ءِ کننگا۔ دیوان اٹی مچ آ پاکستان اٹی پولیس ءِ پوسکن آ ٹیکنالوجی تننگ نا بارواٹی حوال تننگا۔ مچ آ پاکستان نا پولیس ءِ پوسکن آ ٹیکنالوجی فراوان کننگ کن سرجمی اٹ سلابت کننگا۔ دیوان اٹی چینی شاری تا سیکورٹی نا بابت کروک آ گام گیج آتا خوڑتی اٹ جاچ ءِ ہلنگا۔
