اسلام آباد۔ 19 اپریل (اے پی پی) بنجائی وزیر حوالکاری و شینکاری عطاء اللہ تارڑ پارینے کہ پی ٹی آئی والا ک اڈیالہ غان ملک دشمنی نا گائیڈ لائن ہلنگ ءُ، کس اسے پاکستان آ تنقید و خارجہ پالیسی آ جلہوگیر مننگ نا موکل تفننگک۔ خارجہ پالیسی تون گوازی کننگ عمران خان نا وطیرہ مسنے۔ جمعہ نادے آ قومی اسمبلی ٹی گپ وتران کرسا بنجائی وزیر حوالکاری پارے کہ او ہاؤس نا چکار ءِ پاکستان نا فائدہ غاتون گنڈوک خارجہ پالیسی نا پڑانا کنڈآ کرفنگ خواہک۔ خارجہ پالیسی اسہ حساس موضوع اسے، تدوک آ دے صدر مملکت ناتران اٹی ہراداایوان اٹی مس، افسوزناک ئس، مستین اٹ دا ہاؤس نا روایت مسنے کہ اپوزیشن نا کنڈآن علامتی برانز کننگاکہ اوکان پد ایوان اٹ تولسا تقریر ءِ بِننگاکہ، درو گیلریز اٹی درملکی سفارتکار آک ہم ساڑی ئسر و اوفتا ساڑی گری ٹی ایوان نا تہہ ٹی باجہ خلنگا، اپوزیشن ایوان نا تہہ ٹی غلط روایت اس شاغنگ ءِ، مستین اٹ داوڑ ایوان نا چاگڑد ءِ اسُل خراب کننگتنے۔ بنجائی وزیر حوالکاری پارے کہ ہراتم کہ سنگت ملک آتا کنڈآن پاکستان نا دورہ غا ڈل آک بریرہ یا زرکاری نا بابت عندیہ اس تننگک تو اپوزیشن نا کنڈآن پاکستان نا سنگت ملک آتا بابت چندی وڑنا بیان مون آ بریک۔
