واشنگٹن۔ 19 اپریل(اے پی پی) بنجائی وزیرخزانہ و محصولات محمد اورنگزیب پارینے کہ پاکستان نا زرگزران 2047اسکان مسہ ٹریلین ڈالر اسکان ودنگ نا لائخی تخک، پاکستان سعودی زرکارآتیکن بینکاری و زرکاری نا قابل ڈٹ پیش کیک، ٹیکسیشن و پرائمری بیلنس نا باندات آتیا صوبہ غاتون اواری اٹ کاریم کننگ اُن۔ وزیرخزانہ داخیال آتا درشانی ءِ تدوک آ دے واشنگٹن ڈی سی ٹی جہانی بینک و جہانی مالیاتی فنڈ اناہتم ناسالانہ دیوان نا وخت آ چندی اوڑدہی تیٹی کرے۔ وزیرخزانہ سعودی فنڈفار ڈویلپمنٹ نا چیف ایگزیکٹیو آفیسر سلطان عبدالرحمان المرشد تون اوڑدہی کرے۔ وزیرخزانہ اودے تینا ساڑی آ دورہ ءِ سعودی عرب و دا ہفتہ پاکستان آ بروک آ سعودی ڈل انا بارواٹی حوال تس۔ وزیرخزانہ سعودی ڈویلپمنٹ فنڈ انا رداٹ برجاڈٹ آتا پیش رفت آ است جمی نا درشانی ءِ کرے۔ اوڑدہی ٹی کراچی آن چمن اسکان این 25 شاہراہ نا تفنگ و دیامیر بھاشا ڈیم فنڈنگ آ گپ وتران کننگا۔ وزیرخزانہ پارےکہ پاکستان سعودی زرکارآتیکن بینکاری و زرکاری نا قابل ڈٹ پیش کیک۔ وزیرخزانہ جہانی بینک انا کنڈآن “ترند نتیجہ وعظیم تر اثرآتیکن عملدرآمد” نا سرحال آ گول میز کانفرنس اٹی بشخ ہلک۔ وزیرخزانہ جہانی بینک انا سرکڑدہ غاتا سو چ ووژن نا ستاءِ کرے۔ وزیرخزانہ جہانی بینک انا اسہ ساڑی ءُ رپورٹ اسے نا حوالہ ءِ ترسا پارےکہ دا رپورٹ اٹی پاکستان کن 2047اسکان اسہ بڑزکو نیامی کٹیاوالا ملک جوڑ مننگ نا اسہ پیدوار روڈ میپ اس جوڑ کننگا۔ اوپارے کہ پاکستان نا زرگزران 2047اسکان 300 بلین ڈالر مسہ ٹریلین ڈالر اسکان ودنگ نا لائخی تخک۔ اوپارےکہ داہیت ستاکڑزک کہ موسمیاتی بدلی ، ڈیجیٹلائزیشن و انسانی شونداری نا امور اٹی جہانی بینک و پاکستان نا حکومت نا اولیت آک اسہ وڑ ءُ۔
