کوئٹہ۔ 18 اپریل (اے پی پی)چیف انجینئر ایری گیشن کوئٹہ ڈویژن انجینئر بشیر الدین ترین پارینے کہ کوئٹہ شار اٹی ساڑی آ پِر تا سوب آن ڈیم تیٹی دیر انا کچ بڑز مسنے ہراڑآن ڈغار اٹی دیر انا کچ بڑز بریک ولے کوئٹہ نا کیبی ٹی واقع غٹ ڈیمک رکھ ءُ ہرافتے ہچ ءُ خطرہ اس اف گڑاس دیم تا پُرمننگ نا سوب آن اسپیل وے تا کمک اٹ دیرءِ ڈسچارج کننگ انگ ءِ، محکمہ ایری گیشن نا نالہ غاتیا اسٹ اسے ہم تجاوزات آتا موکل تفنگک۔ تجاوزات آتیٹی اوار بندغ آتا برخلاف کانود نا رداٹ کارروائی کننگک۔ داہیت ءِ او چیف سیکرٹری بلوچستان و سیکرٹری ایری گیشن نا خصوصی پارت آ اسپین کاریز، کچھ ڈیم، سرہ غڑگئی و کوئٹہ نا کیبی ٹی واقع ڈیم تا معائنہ نا وخت آ گپ وتران کرساپارے ، داوخت آ سپرنٹنڈنگ انجینئرنگ کوئٹہ سرکل قربان جتوئی، ایگزیکٹیوانجینئر ایری گیشن کوئٹہ ڈویژن انجینئر ندیم احمد دہوار، ایس ڈی او محسن مرزا ، ایس ڈی او منور خان، ایس ڈی او خورشید احمد بنگلزئی ئسک ہم اوڑتون اوار ئسر۔ ایگزیکٹیوانجینئر ایری گیشن کوئٹہ ڈویژن انجینئرندیم احمد دہوار چیف انجینئر ءِ ڈیم تا بارواٹی سرجمی اٹ حوال تس و پارےکہ کوئٹہ شار انا کیبی ٹی محکمہ ایری گیشن نا 50 نا خڑک ڈیم تیٹی ہرافتیان گڑاس ڈیم ساڑی آ پِر تا سوب آن پُرمسنو ہرافتیان دِیر اسپیل وے انا کمک اٹ ڈسچارج کننگ انگءِ۔ اوپارے کہ اگست 2022ء ٹی ترند انگا پِر و نوکاپی ریلہ غاتا سوب آن اسپین کاریز اٹی دِیر زیات بس ڈیم انا اسپیل وے 1945اٹی ڈیزین مسوسس ہراڑآن 8 ہزار کیوسک دیر ڈسچارج مننگ کریکہ ولے 13 ہزار کیوسک دیر ڈسچارج مننگ نا سوب آن اسپیل وے ءِ نسخان رسینگا اوکان پد نیشنل ڈیزاسٹر رسک مینجمنٹ فنڈ انا کمک اٹ اے ڈی بی نا چاروکی اٹی اسپیل وے انا تفنگ نا کاریم ترندی اٹ برجاءِ ولے ڈیم پورو وڑاٹ رکھ ءِ۔ حوال اٹی پاننگاکہ اسپین کاریز ڈیم اٹی دیر کوڑی کننگ نا گنجائشت مسہ نیم ہزار ایکڑفٹ ءِ وخت اس کہ داوخت آ ڈیم اٹی 2 ہزار ایکڑفٹ دِیر کوڑی مسنے ہندا وڑ گڑاس ڈیم اٹی 6 ءُ نیم سد ایکڑ فٹ دیر کوڑی کننگ نا گنجائشت ءِ ہراڈیم پورو پُرمسنے وخت اس کہ سرہ غڑگئی ڈیم اٹی 4 ءُ نیم سد ایکڑ فٹ دیر کوڑی کننگ نا گنجائشت ءِ دا ڈیم ہم پورو پُرمسنے اوکان پد گڑاس ڈیم و سرہ غڑگئی ڈیم آن اسپیل وے نا کمک اٹ دیر ڈسچارج کننگ انگ ءِ۔ داوخت آ گپ وتران کرسا انجینئر بشیرالدین ترین پارے کہ محکمہ ایری گیشن نا انجینئر کوئٹہ و صوبہ نا ایلو علاقہ غاتیٹی تفنگوک آ ڈیم تا تینٹ چاروکی ءِ کننگ ءِ ڈیم تا تفنگ اٹ ڈیوالئی نا ہچ ءُ گنجائشت اس اف۔ اوپارے کہ کوئٹہ شار انا کیبی ٹی واقع ڈیم تیٹی ساڑی آ پِر تیان پد دیر اٹی ودکی مسنے ولے اسہ ڈیم اسے نا ہم پِننگ نا ہچ ءُ خطرہ اس اف۔
