لاہور ۔ 18 اپریل (اے پی پی) وزیرمملکت انفارمیشن ٹیکنالوجی شیزافاطمہ خواجہ پارینے کہ وزیراعظم محمد شہباز شریف درملکی زرکاری نا مشن آ کاریم کننگ اٹی ءِ، حکومت آئی ٹی نا بشخ انا شونداری کن ہرممکن کمک کیک، پاکستان اٹی ٹیکنالوجی نا بشخ شون ہلنگ ءِ۔ داخیال آتا درشانی ءِ او پنچ شنبے نادے آ داڑے آئی ٹی سی این ایشیانمائش نا دود آن تران کرسا کرے۔ وزیر مملکت شیزافاطمہ خواجہ پارے کہ پاکستان ڈیجیٹل شونداری نا کنڈآہِننگ ءِ، پاکستان ءِ آئی ٹی حب جوڑ کینہ، آئی ٹی غٹ بشخ آتا شونداری نا سوب جوڑ مننگ اٹی ءِ۔ اوپارے کہ پاکستان ہرسال 10 ہزار آئی ٹی گریجویٹس ودی کننگ ءِ، حکومت آئی ٹی نا بشخ انا شونداری کن ہرممکن کمک کیک و دا بشخ ءِ مون آ دننگ کن پبی گام گیج کننگ اٹی ءِ۔ وزیر مملکت پارے کہ وزیراعظم محمد شہباز شریف نا وژن ءِ کہ بزنسز ءِ سپورٹ کننگے و داٹی ہروڑنا اڑاند آتے مرکننگک و دا چرجوئی ٹی نجی بشخ ءِ ہروڑنا سپورٹ فراوان کننگ ءِ۔
