اسلام آباد۔ 18اپریل (اے پی پی) وزیراعظم محمد شہباز شریف پارینے کہ پاکستان اٹی سعودی زرکاری و واپاری و سٹریٹجک شریداری نا پوسکن آ دور انا بناء،، سعودی زرکاری آن ڈٹ آتا پوروی نا چاروکی ءِ کیوہ، جہانی زرکاری نا ڈٹ آتا بابت لاپرواہی ءِ منپنہ، جہانی زرکاری نا ڈٹ آتے ایسر اسکان سرکننگ کن جہانی شہرت یافتہ چاہندار آتا خذمت ءِ ہلنگے، زرکاری بورڈ، ایس آئی ایف سی و تعلقدار وزارت آک سعودی ڈل انا نیام اٹ مذاکرات اٹی طے مروک ڈٹ آتا پوروی کن لائحہ عمل اس ٹہیفر۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او سعودی ڈل انا ساڑی آ دورہ ءِ پاکستان و چندی بشخ آتیٹی سعودی زرکاری نا بابت بڑزکو کہول انا جاچ دیوان ناکماشی ءِ کرساکرے۔ دیوان اٹی بنجائی وزیر محمد اسحاق ڈار ، خواجہ محمد آصف، جام کمال خان، احدخان چیمہ، عطاء اللہ تارڑ، رانا تنویر حسین ، احسن اقبال، سالک حسین چوہدری ، سردار اویس خان لغاری، عبدالعلیم خان ، ڈاکٹر مصدق ملک، وزیر مملکت شزہ فاطمہ خواجہ، خصوصی کمکار طارق فاطمی ، ڈپٹی چیئرمین پلاننگ کمیشن محمدجہانزیب خان ، قومی اسمبلی نا باسک بلال اظہرکیانی، رومینہ خورشید عالم، وزیراعظم نا کوآرڈی نیٹر رانا احسان افضل و تعلقدار بڑزکو کمامدارآک بشخ ہلکر۔ دیوان ءِ چندی بشخ آتیٹی سعودی ڈل انا زرکاری ٹی است خواہی و پاکستان نا کنڈآن ڈٹ آتا پیش کش نا بابت معلومدار کننگا۔ دیوان ءِ پاننگاکہ ہڑتوم آ ملک آتا نیام اٹ مذاکرات اٹی کانڑ کنی و معدنیات ، کشت وکشار، توانائی، انفارمیشن ٹیکنالوجی و انفراسٹرکچر نا شونداری نا بشخ آتیٹی زرکاری آ گپ وتران مس۔ دیوان ءِ پاننگاکہ پاکستان ءِ جہانی سپلائی چین و ویلیو چین نا بشخ جوڑ کننگ کن گام گیج آتیا ہم گپ وتران مذاکرات نا بشخ ئس وخت اس کہ سعودی ڈل پاکستان نا دا بابت تیاری نا پبی وڑاٹ ستاءِ کرے۔ دیوان اٹی بشخ ہلوک آک پاکستان اٹ پیشن نا زرکاری کن سنگت ملک آتا ڈل آتا بننگ ءِ ساڑی حکومت نا سفارتی پڑآ سرسہبی و پاکستان نا شونداری و شونہالی کن ستاکڑزوک گوندا۔ وزیراعظم پارے کہ پاکستان اٹ سعودی زرکاری و واپاری و سٹریٹجک شریداری نا پوسکن آ دور انا بناءِ، سعودی ولی عہد شہزادہ محمد بن سلمان نا بے حد منت وار اُن کہ اونا خصوصی چکار نا سوب آن پاکستان سعودی عرب زرکاری و واپاری تعلقداری نا پوسکن آ دور انا بناممکن مس۔ اوپارے کہ سعودی ڈل انا دورہ ءِ پاکستان ءِ ہڑتوم آملک آتیکن تین پہ تینی وڑاٹ فائدہ ئی شریداری اٹ بدل کننگ کن تیاری آ بنجائی وزیر، ایس آئی ایف سی و تعلقدار آفیسر آتا کوشست آک ستاکڑزرہ۔ وزیراعظم پارے کہ جہانی زرکاری نا ڈٹ آتے ایسر اسکان سرکننگ کن جہانی شہرت یافتہ چاہندار آتا خذمت ءِ ہلنگے۔ اوپارے کہ کنتون اوار مچ آ قوم خادم الحرمین شریفین سلمان بن عبدالعزیز السعود و ولی عہد محمد بن سلمان نا پاکستان تون کمکاری و شریداری ءِ مون آ دننگ اٹ بھاز است خواہی آ اونا منت واراُن۔
