اسلام آباد۔ 17 اپریل (اے پی پی) بنجائی وزیر خزانہ و محصولات محمد اورنگزیب پارینے کہ پاکستان نا حکومت نجی بشخ انا زرکاری و پبلک پرائیویٹ پارٹنر شپ نا لائخی و کچ آن فائدہ ہرفنگ کن مالیات نا پوسکن آ ماڈل آتا است بڈی ءِ کننگ اٹی ءِ، جہانی بینک و ایشیائی شونداری بینک ملک انا راجی و اقتصادی شونداری ٹی اہم کڑد ادا کننگ ءُ۔ اوداخیال آتا درشانی ءِ تدوک آ دے واشنگٹن ڈی سی ٹی جہانی بینک انا صدر اجے بنگا، ایشیائی شونداری بینک انا صدر مساتو گو آساکاواو ڈولپمنٹ فنانس کارپوریشن نا چیف ایگزیکٹیو آفیسر سکاٹ ناتھن تون اوڑدہی تیٹی گپ وتران کرساپارے۔ جہانی بینک انا صدر تون اوڑدہی ٹی وزیرخزانہ پاکستان نا راجی و اقتصادی شونداری ٹی جہانی بینک انا کڑد و کمکاری ءِ مون آتخا۔ وزیرخزانہ جہانی بینک انا صدر ءِ سٹینڈ بائی معاہدہ نا رداٹ زرگزران نا پائیدار نمو، خراج، توانائی و نجکاری نا بابت اصلاحات نا بارواٹی ہم پارے۔ فریق آک 10 سال آتیکن رولنگ کنٹری فریم ورک پلان آن امنا کریر۔ جہانی بینک انا صدر زرگزران نا سوگوی و محصولات آتیٹی ودکی کن اصلاحات و ڈیجیٹلائزیشن نا پروگرام نا رداٹ تینا پورو لائخی تا باوری کرفے۔ وزیرخزانہ جہانی بینک انا صدر ءِ دورہ ءِ پاکستان نا سلہ ہم خلک۔ ایشیائی شونداری بینک انا صدر تون اوڑدہی ٹی وزیرخزانہ ملکی شونداری و راجی شونہالی ٹی جہانی بینک انا کڑد و کمکاری نا ستاء کرے۔ اوڑدہی ٹی ایشیائی شونداری بینک اتون پاکستان نا شریداری ءِ سوگو کننگ ورعایتی فنانسنگ و آخبت نا ڈٹ آتیکن فنڈ آتا فراوانی نا بابت امور آ چکار کننگا۔ وزیرخزانہ پارے کہ ایشیائی شونداری بینک پاکستان نا اہم شونداری شریدار ءِ و ملک انا راجی و اقتصادی شونداری ٹی بینک مدام پاکستان تون کمک کرینے۔ داکان بیدس ڈویلپمنٹ فنانس کارپوریشن نا چیف ایگزیکٹیو آفیسر تون اوڑدہی ٹی پاکستان اٹی کارپوریشن نا زرکاری ٹی ودکی نا بابت امور نا جاچ ءِ ہلنگا۔
