کوئٹہ۔ 25 مارچ (اے پی پی) بلوچستان اسمبلی نا باسک و طبی چاہندار آک پارینو کہ پاکستان اٹی ہرسال کم و ود 6 لکھ آن زیات بندغ آک ٹی بی آن زہمی مریرہ ٹی بی نا اسہ تہائی مریض درمان کن اسہ جاگہ اس ہم رجسٹرڈ مفسہ ہرا دا ناجوڑ ی ءِ تالان کننگ اٹ کمک کیرہ تدوک آسال 2023 اٹی بلوچستان اٹی ٹی بی کنٹرول پروگرام 15000نا خڑک ناجوڑ آتیٹی ٹی بی نا تشخیص ءِ کرسا اوفتے درمان نا آسراتی فراوان کرے، محکمہ جان جوڑی و ایلوادارہ غاتے بلوچستان حکومت نا پورو کمک مریک بدبختی اٹ پان یا نابودی کہ یک و نیم سال اٹی محکمہ جان جوڑی نا 7 سیکرٹری بدل مسنو نن تینا پالیسی تیا بایدے چکار کین۔ داہیت ءِ بلوچستان اسمبلی نا باسک میر ظہور احمد بلیدی، مینا مجید، سیکرٹری سپورٹس ڈاکٹر جاوید انور شاہوانی، ڈی جی ہیلتھ بلوچستان ڈاکٹر فاروق ہوت، صوبائی ٹی بی کنٹرول پروگرام نا منیجر ڈاکٹر آصف شاہوانی، مسکوہی ڈی جی ہیلتھ ڈاکٹر نور قاضی، ڈبلیو ایچ او نا اسفند یار شیرانی، مرسی کور نا ٹیم ہیڈ ڈاکٹر سعید اللہ خان و ایلوفک ٹی بی نا جہانی دے انا رداٹ ہندی ہوٹل اٹی اڈ ہلوک دود آن تران کرسا پاریر۔ بلوچستان اسمبلی نا باسک میر ظہور بلیدی پارے کہ محکمہ جان جوڑی نا چندی پروجیکٹ آتیا کاریم کروک آ سروک آتے ڈاکٹر آصف شاہوانی آنبار تیناکارکڑد ءِ پین گچین کننگ نا گرج ءِ تانکہ بلوچستان نا الس ءِ جان جوڑی نا گچین آسراتی تا فراوانی ءِ پک کننگ مرے۔ اوپارےکہ حکومت نا کنڈآن کمکاری مدام مسنے ولے پالیسی تیا نظرثانی کروئی مریک۔ اوپارے کہ بدبختی پان یا نابودی کہ یک ونیم سال اٹی محکمہ نا 7 سیکرٹری بدل مسنے نن تینا پالیسی تیا بایدے چکار تخن ۔ بلوچستان اسمبلی نا باسک مینا مجید پارے کہ محکمہ جان جوڑی و ایلو ادارہ غاتے بلوچستان حکومت نا پورو سپورٹ دوئی مسنے شاری حلقہ غاتیٹی آسراتی دوئی ءِ ننے خلق آتا کنڈآ چکار کننگ نا گرج ءِ ۔ اوپارے کہ خلقی علاقہ غاتیٹی الس اٹ شعور و آگاہی مفننگ نا سوب آن ٹی بی نا مریض آتیٹی ودکی مننگ ءِ ننے مرے کہ خلقی علاقہ غاتیٹی الس اٹی ٹی بی آن بچفنگ کن شعور و آگاہی پروگرام اڈایتن۔ ترانکارآک پاریر کہ ٹی بی نا ناجوڑی اسہ بندغ آن ایلو بندغ اٹی منتقل مریک دا جون اسہ ہر بشخ اٹی مننگ کیک ولے عموما روتیک آتے شست کیک بلغم زدہ جکہ ٹی بی (Tuberclusis)نا خاص نشانی ءِ ٹی بی اسہ مہلک ءُ مرض اسے ہرا قابل درمان ءِ۔ اوپارے کہ 24 مارچ ٹی بی، تپ دق نا جہانی دے انا وڑاٹ اڈتننگک دادے مچ آ دنیا ٹی داناجوڑی نا بارواٹی آگاہی کن چندی دود آتا بست وبند کننگک تپ دق یعنی ٹی بی لاعلاج ءُ ناجوڑی اس اف و دانا درمان کن دوائی ہم ننا غٹ بلوچستان نا ہرہسپتال سول ہسپتال، بی ایچ یوز، آرایچ ایس سی آن مفت و آسانی اٹ دستیاب ءِ ولے داغٹ آن پد ہم ٹی بی اسہ ہندن ءُ خطرناک ناجوڑی اس جوڑ مسنے ، ٹی بی نا گواچی دا بندغ آتے تینا زند انا کافی وخت تکلیف و فریشانی تیٹی گدریفوئی تمک ہراتم دانا مریض جکک تو تہو انا کمک اٹ دانا بلغم اٹی ساڑی ٹی بی بیکٹیریاایلو انسان تسکان سرمریک و ہنداوڑ اسہ پین ٹی بی نا مریض اس تیار مریک۔ اوپارے کہ صوبائی ٹی بی کنٹرول پروگرام محکمہ جان جوڑی بلوچستان سال 2024ء ٹی وزیراعلیٰ میر سرفراز بگٹی ، سیکرٹری جان جوڑی عبداللہ خان، ڈی جی ہیلتھ ڈاکٹر فاروق ہوت نا پارت آتے مون آتخسا اسہ پوسکن ءُ عزم اسے تون ٹی بی نا چٹفنگ کن جہد کننگ ءِ ننا کوشست ءِ کہ بلوچستان ءِ ٹی بی نا مہلک ناجوڑی آن پاک کننگے دا چرجوئی ٹی صوبائی ٹی بی کنٹرول پروگرام تینا شریدار مرسی کور، ایس پی او، گرین سٹار، سوشل مارکیٹنگ، ترقی فاؤنڈیشن و دوپاسی فاؤنڈیشن نا کمک اٹ زہمی مروک آ بندغ ، خاہوت ، بندی و منشیات نا عادی بندغ آتیکن تشخیصی ٹیسٹ اکن خصوصی کیمپ اڈتننگ ءِ۔ صوبہ نا چندی ضلع غاتیٹی 47 سینٹر آتے ٹی بی نا تشخیص کن Gene-Xpertمشین تننگانے۔
