ریاض۔ 25 مارچ (اے پی پی) سعودی عرب اٹی پاکستان نا سفیر احمد فاروق پارینے کہ دا اونا سعودی عرب اٹی اولیکو روچہ مبارک ءِ و بھاز زیبا ءُ آزموندہ اسے۔ اردو نیوز نا رداٹ اوپارےکہ داکان مست او ڈنمارک اٹی ئس و اودا پاننگ کریکہ کہ سعودی عرب اٹی مسلمان ایلم تتون روچہ مبارک ءِ تیر کننگ اسہ جتا و بھاز جوان ءُ آزموندہ اسے ۔ اوپارے کہ سعودی عرب نا روایت آک بھاز زیبا ءُ۔ منہ دے مست او مدینہ منورہ غا ہنا و مسجد نبوی ٹی باملا ہرا اسہ یکتا ءُ آزموندہ اس ئس۔ داڑے ساڑی چندی بندغ آک کنے تینا دسترخوان آ باملنگ نا سلہ خلکر۔ اوپارے کہ اوٹی بھاز مہرومریبت و گرم جوشی محسوس مس ، دا سعودی عرب نا روایتی مہمانداری ءِ۔ داکان بیدس سعودی عرب اٹی روچہ مبارک اٹی مخلوق اسہ ایلو ءِ ٹیکی ایترہ ہرا ایلو ملک آتیٹی بھاز کم مون آ بریک۔ پاکستانی سفیر پارےکہ روچہ تخنگ نا روحانی کیفیت و عقیدت پاکستان تون بھاز مشاہبت تخک۔ روچہ مبارک سنگت و سیل آتا اسٹ مننگ و اللہ تون تعلق ءِ گنڈنگ نا موقع اسے۔ داکان بیدس مخلوق دا تُوا ٹی ضرورت مند بندغ آتیکن صدقہ ، خیرات و زکواہ ایترہ و اوفتے لگک کہ دا پلو پاکستان و سعودی عرب ہڑتوم آتیٹی مشترک ءِ۔ اوپارےکہ سعودی عرب اٹی روچہ مبارک نا آزموندہ نا خوشگوار احساس ءِ و پاکستان اٹی ہم ہنداہی وڑ مریک۔
