کوئٹہ۔ 22 مارچ (اے پی پی)پاکستان پیپلزپارٹی نا بلوچستان اسمبلی نا باسک چیف آف گورگیج میر عبیداللہ گورگیج و ڈپٹی کمشنر سعد بن اسد ئسک پارینو کہ روچہ مبارک اٹی نن تینا دامون ایمون نیزگار و حقدار بندغ آتا خیال ءِ تخن، حکومت تینا وسیلہ غاتیٹی مرسا الس ءِ ریلیف فراوان کننگ کن ہرممکن کوشست کننگ ءِ۔ داہیت ءِ اوفک تینا حلقہ گچین کاری ٹی نیزگار وحقدار بندغ آتیٹی روچہ مبارک نا رداٹ کنوئی آ گڑا بشخنگ نا وخت آ گپ وتران کرسا پاریر۔ داوخت آ پاکستان پیپلزپارٹی نا ڈپٹی جنرل سیکرٹری میر ثناء اللہ جتک، مرکزی راہشون میر لعل محمد جتک ایگزیکٹیو کمیٹی نا صوبیدار جتک، اسپورٹس اینڈ ونگ بلوچستان نا صوبائی صدر شہزادہ کاکڑ ، ولی وردنگ ، پیپلز یوتھ نا صوبائی نائب صدر امتیاز جتک، امین بنگلزئی ، دوست ریکی، طارق بگٹی و ایلوفک ہم ساڑی ئسر۔ باسک بلوچستان اسمبلی میر عبیداللہ گورگیج پارے کہ داوخت آ کبینی نا سوب آن نیزگار الس فریشان ءُصوبائی حکومت وزیراعلیٰ بلوچستان نا کماشی ٹی الس ءِ ریلیف فراوان کننگ کن ہرممکن گام گیج کننگ اٹی ءِ۔ اوپارے کہ تینا حلقہ گچین کاری نا الس نا ویل آتیان پورو وڑاٹ بلد اُٹ و اوفتے ایسر کننگ کن غٹ دوئی وسیلہ غاتے کاریم اٹ اتنگک۔ اوپارے کہ روچہ مبارک اٹی نیزگار و حقدار بندغ آتا مشکل آتے مون آ تخسا راشن بشخنگ انگ ءِ ہرانا چرجوئی آخبت ہم برجا تخنگک۔ ڈپٹی کمشنر سعد بن اسد پارے کہ وزیراعلیٰ نا خصوصی پارت آ روچہ مبارک اٹی الس ءِ ریلیف فراوان کننگ کن اڑزان بازار اڈتننگ انگ ءِ وخت اس کہ تینا خود آن کبینی کننگ نا موکل تفننگک۔ اوپارے کہ روچہ مبارک نا تُو انا بابرکت تُو اٹی سخی تے مرے کہ او نیزگار و حقدار بندغ آتا پبی خیال ءِ تخسا اللہ تعالیٰ نا خوشنودی ءِ دوئی کیر۔ داوخت آ اسمبلی نا باسک میر عبیداللہ گورگیج و ڈپٹی کمشنر کوئٹہ سعد بن اسد نیزگار و حقدار بندغ آتیٹی راشن بشخار۔
