برسلز۔22مارچ (اے پی پی) وزیرخارجہ محمد اسحاق ڈار جوہری توانائی نا اولیکو سروک دیوان نا وخت آ برسلز اٹی چین نا نائب وزیراعظم ژانگ گوچنگ تون اوڑدہی کرے۔ جمعہ نادے آ دفترخارجہ نا کنڈآن جاری بیان نا رداٹ اوڑدہی ٹی وزیرخارجہ محمد اسحاق ڈار و چین نا نائب وزیراعظم ژانگ گوچنگ پاکستان۔ چین آل ویدر سٹریٹجک کوآپریٹیو پارٹنر شپ و سوگو سنگتی ءِ بے مٹ و یکتا تعلقداری نا وڑاٹ ستاءِ کریر۔ اوسول نیوکلیئر ٹیکنالوجی ٹی پاکستان و چین نا نیام اٹ دیرینہ کمکاری نا اہمیت آ امنا کریر۔ اوڑدہی ٹی وزیرخارجہ محمد اسحاق ڈار ون چائنا پالیسی کن پاکستان نا متکن آ مخ تفی نا درشانی ءِ کرے۔ اوداہیت آ زور شاغا کہ چین اتون تعلقداری آ پاکستان اٹی پورو امنائی سلاہ ءِ و سی پیک نا فیز 2 اکن پاکستان سوگو عزم تخک۔ داوخت آ چینی نائب وزیراعظم داہیت انا درشانی ءِ کرے کہ چین پاکستان نامالی حالیت آتے سوگو کننگ اٹ کمک کیک۔ اوچین پاکستان اقتصادی راہداری نا ڈٹ (سی پیک) ءِ اپ گریڈ کننگ، صنعت ، کانڑ کنی و انفارمیشن ٹیکنالوجی تون اوار چندی بشخ آتیٹی کمکاری ءِ پین سوگو کننگ کن چینی آمادگی نا درشانی ءِ کرے۔
