اسلام آباد۔ 21 مارچ (اے پی پی) وزیراعظم محمد شہباز شریف پاکستان اٹی جنگل آتا رقبہ ءِ ودفنگ و جنگل آتے رکھ کننگ کن حکومت پاکستان نا پبی عزم انا درشانی ءِ کرسا صوبائی حکومت، سول سوسائٹی و غٹ شاری تیا زور شاغانے کہ او حکومت نا ‘‘گرین پاکستان’’ مہم اٹی شریدار مریر، ننے تینا شونہال آخبت کن اینو درخت خلوئی مریک۔ پنچ شنبے نادے آ جنگل آتا جہانی دے انا وخت آ تینا کلہو اٹی وزیراعظم پارے کہ پاکستان اٹی ہم دنیا نا ایلو ملک آتیانبار جنگل آتا جہانی دے ءِ اڈتننگ انگ ءِ۔ برجاسال دادے انا سرحال‘‘ جنگل آتا اختراع: اسہ گچین ءُ دنیا سے کن پوسکن ءُ ایسر’’اسے ہرا جنگل آتے ودوک آ خطرہ غاتون مون تننگ کن تکنیکی اختراع تے کاریم اٹ اتنگ نا گرج ءِ تالان کیک۔ اختراع تا کمک اٹ جنگل آتے گچین وڑاٹ رکھ و پائیدار بنداو تیا برقرار تخا و جنگل آتا گڈنگ ، اوفتے ٹی جوڑ مساکن نا بھسکاری و چاگڑدی بدلی نا خطرہ غاتے کم کننگ مریک۔ وزیراعظم پارے کہ پاکستان نا کل رقبہ نا 5 درسد آن ہم کم جنگلات ءُ و ہرسال دا جنگل آتا کم وود 1.5 درسد رقبہ کم مننگ ءِ۔ دانا پاکستان نا حیاتیاتی تنوع، چاگڑد وکشت وکشار آ بھلو اثراس تمنگ ءِ۔ دنیا نا چاگڑد آن غٹ آن زیات زہمی مروک آ اسہ ملک اسے نا حیثیت اٹ پاکستان اٹ چاگڑدی بدلی تا سوب رونما مروک آ واقعہ غاتیٹی ودکی و پاکستان نا اوفتیان بھاز بے وڑ زہمی مننگ داہیت انا خواہندار ءِ کہ نن تینا ہندی جنگل آتے رکھ کین، دا ننا بقاکن المی مسنے۔ وزیراعظم پارے کہ مسلم لیگ (ن) نا حکومت 2016ٹی اولیکو وار ‘‘گرین پاکستان’’ ڈٹ انا بناءِ کرے ہرانا مسخت ملک اٹی جنگل آتا رقبہ ءِ ودفنگ ئس، داوخت آ حیاتیاتی تنوع ءِ رکھ کننگ کن اجتماعی کوشست کننگا، داسہ دانا مون آ ریسہ نا بناءِ کننگ اُن ہرانا رداٹ جنگل آتا رقبہ ءِ ودفنگ، جنگلی حیاتیات نا مساکن ءِ رکھ کننگ و فضاٹی کاربن نا اخراج ءِ کم کننگ(کاربن سیکوئسٹریشن) اٹی کمک رسینگک۔ وزیراعظم پارے کہ چاگڑد اٹی جنگل آتا اہم کڑد ءِ مون آ تخسا نن جنگل آتا رکھ انا عزم ءِ کینہ۔ اوپاکستان اٹ جنگل آتا رقبہ ءِ ودفنگ و جنگل آتے رکھ کننگ کن حکومت پاکستان نا پبی عزم انا درشانی ءِ کرسا باوری کرفے کہ مچ آملک اٹی جنگل آتا چاگڑدی نظام نا رکھ ءِ کننگک انتئے کہ داڑآ ننا چاگڑد نا گچینی و ننا زند انا دارومدار ءِ۔ وزیراعظم صوبائی حکومت، سول سوسائٹی و غٹ شاری تیا زور شاغا کہ او ‘‘ گرین پاکستان’’ نا حکومت نا مہم اٹی شریدار جوڑ مریر۔ اوپارے کہ اینو ننے تینا آخبت کن زرکاری کروئی ءِ۔ اوقوم آ زور شاغا کہ اینو ننے تینا انمول وسیلہ غاتا رکھ اکن کوشست کروئی مریک و تینا بروک آ چین تیکن تینا زمواری تے گچین وڑاٹ اداکروئی مریک ۔ وزیراعظم پارے کہ تینا شونہال آخبت کن اینو ننے درخت خلوئی مریک۔
