اسلام آباد۔ 21 مارچ (اے پی پی) بنجائی وزیر حوالکاری و شینکاری عطاء اللہ تارڑ سی پیک ءِ پاکستان نا زرگزرانی شونداری نا مون آ دننگ کن اہم مزل اس گوندسا پارینے کہ پاکستان و چین نا نیام اٹ سی پیک نا دروشم ات خڑکی و پائیدار شریداری ڈیہہ انا گیشتر فائدہ ٹی ءِ، پاکستان ءِ زرکاردوست ملک اس جوڑ کننگ وزیراعظم شہباز شریف نا وژن ءِ۔ داہیت ءِ او پنچ شنبے نادے آ داڑے اوڑدہی کن بروک پاکستان اٹ تعینات السی جمہوریہ چین نا سفیر جیانگ ژئی ڈونگ تون گپ وتران کرسا پارے۔ چینی سفیر عطاء اللہ تارڑ ءِ وزارت حوالکاری نا قلمدان ءِ سنبھالنگ آ مبارکبادی تس۔ اوڑدہی ٹی سی پیک، پاک چین اسٹریٹجک تعلقداری، میڈیا وفلم انا بشخ اٹی برجا کمکاری و سی پیک نا بارواٹی جعلی خبرآتا توننگ کن چین پاکستان انفارمیشن کوریڈور نا بابت گپ وتران مس۔ بنجائی وزیر حوالکاری سی پیک نا بابت جعلی خبرآتا توننگ کن حکومت تون حکومت و میڈیا تون میڈیا نا کہول آ میکنزم اس جوڑ کننگ نا گرج آ زور شاغا۔ داوخت آ گپ وتران کرسا عطاء اللہ تارڑ پارے کہ پاکستان چین اتون تینا تعلقداری تے قدر انا نظر اٹ ہرک، ہڑتوم آ ملک آک سنگتی نا بے مٹ رشتہ غاتیٹی تفوک ءُ۔ اوپارے کہ 1998ء ٹی کنا پیرہ رفیق تارڑ بطور صدر چین نا وزیراعظم نا ورہ پاکستان آ اودے بخیرکرے۔ پاک چین سنگتی ءِ نن نسل درنسل خنانن، ننے تینا پوسکن آ چین ءِ تینا تاریخی و سوگو سنگتی نا بارواٹی معلومدار کروئی مریک۔ ننے پوسکن آ چین ءِ پاروئی مریک کہ ہراوڑ چین و پاکستان مشکل وخت اٹی اسہ ایلو تون تفینو۔ بنجائی وزیر حوالکاری پارے کہ چین شنگھائی کمکار تنظیم و اقوام متحدہ تون اوار ہر جہانی فورم آ پاکستان نا مخ تفی ءِ کرینے، ہڑتوم آ ملک آتا نیام اٹ سی پیک نا دروشم اٹ خڑکی و پائیدار شریداری ڈیہہ انا گیشتر فائدہ غاتیٹی ءِ۔ اوپارے کہ سی پیک پاکستان نا زرگزرانی شونداری ءِ مون آ دننگ کن اسہ اہم ءُ مزل اسے نا حیثیت تخک۔ بنجائی وزیر حوالکاری پارے کہ چین پاکستان اقتصادی راہداری علاقائی رابطہ غاتا اسہ ہندن ءُ فریم ورک اسے ہراڑآن نئے بیرہ چین و پاکستان ءِ فائدہ مریک بلکن ایران، اوغانستان، ہندوستان، نیامی ایشیائی جمہوریہ و ڈیہہ آ اونا مثبت اثرمرتب مریک۔ اوپارے کہ چین پاکستان انفارمیشن کوریڈور سی پیک نا بارواٹی جعلی خبرتا توننگ نا کنڈآ اسہ اہم ءُ اسٹریٹجک گام اس مریک، دانا مسخت ڈیجیٹل کنیکٹیوٹی و معلومداری نا ہل و تس نا واک ءِ کاریم ا اتنگ ناءِ، وزارت حوالکاری دا بابت تینا کاریم ءِ برجاتخک۔ بنجائی وزیر پارے کہ پاکستان ءِ زرکار دوست ملک اس جوڑ کننگ وزیراعظم شہباز شریف نا وژن ءِ۔ اوڑدہی ٹی ہڑتوم آملک آتا نیام اٹ فلم و دودوربیدہ نا بشخ اٹی کمکاری ءِ ودفنگ آ امنا مس۔ بنجائی وزیر حوالکاری پارے کہ چین آنبار پاکستان ہم اسہ متکن ءُ تہذیب اسے ہرانا تاریخ ہفت ہزار سال متکن ءِ، پاکستان نا دامان سندھ آن بھاز انگا روحانی و دودوربیدہ ئی تحریک مون آ بس ہرا ایشیائی دودوربیدہ نا دروشم اس اختیارکریر۔ اوڑدہی ٹی پاکستان نا قومی خبررساں ادارہ ایسوسی ایٹڈ پریس آف پاکستان و چین نا چائنا میڈیا گروپ (سی ایم جی) نا نیام اٹ مسٹ میکو بیلٹ اینڈ روڈ فورم کن ایم او یو نا بابت ہم گپ وتران مس۔ داوخت آ پاننگا کہ ہڑتوم آ ملک آتا حکومت آ تانیام اٹ فلم پروڈکشن نا معاہدہ ہم زیرعمل ءِ، اے پی پی و شنہوا نیوز ایجنسی نانیام اٹ مفاہمت نا یات داشت آ کاریم برجاءِ۔ اوڑدہی ٹی سی جی ٹی این و پی ٹی وی نا نیام اٹ سفری دستاویز نا اسیجائی پروڈکشن کن کمکاری آہم گپ وتران مس۔ چین نا سفیر پاک چین سنگتی ءِ پین کڑمب کننگ نا است خواہی نا درشانی ءِ کرے۔
