کوئٹہ۔ 21 مارچ (اے پی پی) پاکستان مسلم لیگ (ن) زالبول ونگ انا راہشون فاطمہ خان گوادر ڈویلپمنٹ اتھارٹی کمپلیکس آ دہشت گرد آتا جلہونا مذمت ءِ کرسا واقعہ ٹی شہید مروک آورناتے خراج عقیدت پیش کرینے، دہشت گرد آتا جلہو نا مسخت پاکستان اٹی سوگوی و شونداری ءِ نسخان تننگ ءِ مسلم لیگ (ن) مہالو ہم ملک آن دہشت گردی نا چٹفنگ کن گام گیج کرے داسہ ہم دہشت گرد آتا بیخ کنی ءِ پک کیک۔ داڑے جاری مروک اسہ بیان اسے ٹی فاطمہ خان پارے کہ گوادر ڈویلپمنٹ اتھارٹی کمپلیکس اٹی مروک آ دہشتگردی نا جلہو ءِ بے سہب کننگ آ پولیس و سیکورٹی فورس آتا ورناتے خراج عقیدت پیش کینہ ۔ اوپارے کہ سیکورٹی فورس آتا ورناک جوان مردی نا درشانی ءِ کرسا دہشت گرد آتے خلسا اوفتا ناپاک مسخت آتے بے سہب کریر داوخت آ 2 سیکورٹی کارندہ شہیدی نا جام ءِ نوش کریر ہرا قوم انا ہیروک ءُ۔ اوپارے کہ قوم انا بہادر مارک دہشت گرد آتا برخلاف تینا جون تے ندر کرسا ارض پاک نا رکھ ءِ کننگ ءُ سیکورٹی فورس آک ہرا بہادری و وخت آ کارروائی اٹ جلہو ءِ بے سہب کریر و جلہو گیر آتے خلکر او ستاکڑزرہ ۔ بلوچستان نا امن ءِ شست کروک آک پاکستان و اونا الس دشمنک ءُ ہراہچ ءُ رعایت اسے نا حقدار افس۔ اوپارے کہ دہشت گرد آک تینا درملکی آقاتے خوش و گوادر سی پورٹ ءِ بے سہب کننگ کن بلوچستان اٹی دہشت گردی نا کارروائی کننگ ءُ ولے پاک فوج و ایلو سیکورٹی ادارہ غاک الس تون اواری اٹ دہشت گرد آتا ناپاک مسخت آتے بے سہب کیرہ۔
